Жамбыл облысы тек тарихи жәдігерлерімен ғана емес, жоғары деңгейдегі медициналық туризм орталығы ретінде де танылуда, деп хабарлайды Jambylinfo.kz 

Әсіресе, кардиохирургия саласындағы жетістіктер өңірді халықаралық деңгейде әйгілі етіп отыр. Мұнда шекаралар да, шектеулер де жоқ – тек жүрекке деген шынайы қамқорлық бар.

Қырғызстаннан келген кішкентай науқастың өмірін сақтап қалған оқиға осының айқын дәлелі. Туа біткен жүрек ақауымен ауыр халде жеткізілген балаға Жамбыл облысындағы Кардиохирургия және трансплантология ғылыми-клиникалық орталығының мамандары күрделі операция жасады. Радикалды түзету сәтті өтіп, үш аптадан соң бала отбасымен қауышты. Бұл дәрігерлердің жоғары кәсібилігі мен орталықтың заманауи жабдықталғанын көрсетеді.

Ресейден келген екі әйелдің тағдыры да Жамбылдық кардиохирургтардың арқасында өзгереді. Жедел миокард инфарктісіне ұшыраған пациенттерге шұғыл көмек көрсетіліп, олар үйлеріне сауығып оралды. Түрікменстаннан келген 26 жастағы студенттің өмірі үшін болған күрес те есте қаларлық оқиға. Энергетикалық сусындар мен темекінің зиянынан инфаркт пен коронарлық артерия тромбозына ұшыраған жас жігітке стенттеу жасалып, дәрігерлер оның өмірін аман алып қалды.

Өткен жылы Жамбыл облысында 743 қала сыртынан келген науқас пен 59 шетелдік азаматқа көмек көрсетілген. Кардиохирургтардың еңбегі мен заманауи медициналық технологиялардың үйлесімі өңірдің абыройын асқақтатып отыр. Бүгінде Жамбыл облысы кардиология және кардиохирургия саласында шекарасыз көмек көрсететін, жүрекке деген адал қамқорлықты ту еткен орталыққа айналды.

Бақытжан Бекболат