Жемқорлардың ақшасы білімге жұмсалады: Қазақстанда 28 мектеп салынады
Қазақстанда жемқорлардан тәркіленген қаражат есебінен тағы 28 мектеп салынбақ.
Бұл 22 мың оқушы орнының ашылуына мүмкіндік береді. Қаржыландыру Білім беру инфрақұрылымын қолдау қоры арқылы жүзеге асырылып жатыр, - деп хабарлайды Jambylinfo.kz.
ҚР Оқу-ағарту министрлігінің мәліметінше, бұл бастама 22 мың қосымша оқушыны білім ошағымен қамтамасыз етеді.
Инфрақұрылымды дамыту департаменті басқармасының жетекшісі Жайық Махсутовтың айтуынша, мемлекет оқушылар үшін жағдайды толық жақсарту жұмыстарын белсенді түрде жалғастыруда. 2024 жылы елімізде 25 жаңа білім беру мекемесі салынды, олардың басым бөлігі Астана, сондай-ақ Маңғыстау, Алматы және Жамбыл облыстарында орналасқан.
Жыл басынан бері Қазақстанда 74,4 мың орынға арналған 61 мектеп пайдалануға берілді, оның ішінде 29-ы ауылдық жерлерде орналасқан.
Қаржыландыру президенттің тапсырмасымен құрылған Білім беру инфрақұрылымын қолдау қоры арқылы жүзеге асырылады. Қордың негізгі мақсаты – мектептердегі жүктемені азайту, апатты жағдайдағы ғимараттарды жою және білім беру мекемелерінің ауқымын кеңейту.