Премьер-министрдің орынбасары Қанат Бозымбаевтың төрағалығымен өткен үкіметтік комиссия отырысында "Жомарт" кенішіндегі апатты тергеудің алдын ала нәтижелері қаралды, - деп хабарлайды Jambylinfo.kz

Үкіметтің баспасөз қызметінің мәліметінше, тергеу аясында сегіз кіші комиссия құрылып, ғылыми-зерттеу институттары мен зертханалардың сарапшылары тартылған. Отырыста Төтенше жағдайлар, Ішкі істер, Еңбек және халықты әлеуметтік қорғау министрліктерінің өкілдері тергеу барысы туралы баяндама жасады. Куәгерлерден сауалнама алынып, өндірістік технологиялар зерделенді, техникалық құрылғылардың жарамдылығы тексерілді және тиісті сараптамалар жүргізілді.

Комиссияның алдын ала қорытындылары бойынша, апаттың негізгі себебі – тау-кен қазбасында жиналған метан газының электр жабдықтарының ұшқынынан тұтанып, жарылысқа әкелуі. Сондай-ақ өнеркәсіптік қауіпсіздік пен еңбекті қорғау саласында бірқатар ереже бұзушылықтар анықталып, жауапты тұлғалар белгілі болды.

Жиында Ұлытау облысының әкімі Дастан Рыспеков пен "Қазақмыс корпорациясы" ЖШС басқарма төрағасы Нұрахмет Нұриев қаза тапқандардың отбасыларына әлеуметтік қолдау мен өтемақы төлеу шаралары туралы баяндады. Қазіргі уақытта "Жомарт" кенішінде өндіріс тоқтатылған.

Комиссия қауіпті өндірістік объектілерде осындай оқиғалардың алдын алу шараларын әзірлеп, "Қазақмыс корпорациясы" ЖШС-ға қауіпсіздікті күшейту, ауа құрамын автоматтандырылған жүйелер арқылы бақылау, бейнебақылау орнату және заңбұзушылықтарды жою бойынша тапсырмалар берді.

Тергеу жұмыстары жалғасуда және қатаң бақылауда болады.