Әскери қызметке деген сүйіспеншілік пен білімге деген құштарлық
Әйел адамның өмірде алатын орны ерекше. Ол отбасының ұйытқысы, қоғамның тірегі, Отанның қорғаушысы. Қай саланың болмасын аяғынан тік тұрған әйелдер өздерінің қайсар мінезі мен еңбекқорлығын дәлелдеп келеді.
Сондай ерекше жанның бірі – білім мен әскери қызметті қатар алып жүрген, кіші сержант Эльмира Сманова. Jambylinfo.kz тілшісі оның өмір жолымен танысып, сұхбаттасып қайтқан болатын.
Эльмира Далбайқызы 1983 жылы 3 қаңтарда Жамбыл облысы, Қаратау қаласында дүниеге келген. Бала кезінен білімге деген сүйіспеншілігі оны 1989 жылы Талас ауданы, Көктал ауылындағы Мағжан Жұмабаев атындағы мектепке алып келеді. Мектеп кезінде-ақ болашақ мамандығын таңдаған Эльмира ұстаз болуды армандады.
2000 жылы Тараз мемлекеттік институтының «Қазақ тілі мен әдебиеті» мамандығына түсіп, жоғары білім алады. Әрі қарай өзіне таныс мектепке ұстаз болып оралып, шәкірт тәрбиелеуге кіріседі. Қазақ тілі мен әдебиеті пәнінен сабақ бере жүріп, мектеп директорының орынбасары қызметін де атқарады.
Алайда, өмірдің оған берген жаңа бағыты оның бәрін өзгерте алды.
2008 жылы Эльмира Далбайқызы Қазақстан Республикасының Ішкі істер министрлігінің Ішкі әскер қатарына шақырылады. Бұл шешім оның өмірін түбегейлі өзгертеді.
Қазіргі уақытта Эльмира Сманова Тараз қаласындағы Қазақстан Республикасы Ұлттық ұланының «Оңтүстік» өңірлік қолбасшылығының 5513 әскери бөлімінде құжаттамалық қамтамасыз ету бөлімшесінің маманы болып қызмет атқарады. Түрлі лауазымдарды абыроймен атқарып, кіші сержант шенін иеленді.
Мансап қаншалықты маңызды болса да, Эльмира үшін отбасы әрқашан бірінші орында. Ол екі қыздың аяулы анасы.
Білім мен әскери қызметті қатар алып жүрген Эльмира Далбайқызы – қазақ қыздарының жан-жақты бола алатынының үлгісі.
Эльмира Далбайқызының өмір жолы – ерік-жігер мен табандылықтың үлгісі. Ол білім беру мен әскери қызмет сияқты екі күрделі саланы ұштастыра отырып, әйел адамның кез келген ортада өз орнын таба алатынын дәлелдеді.