Жамбылдықтар жылыту маусымына қаншалықты дайын?

0 46

Облыс әкімі Бердібек Сапарбаевтың төрағалығымен өткен аппараттық кеңесте өңірдің жылуэнергокешенінің, тұрғын үйлердің, әлеуметтік нысандардың алдағы жылыту маусымына әзірлігі талқыланды.

Энергетика және ТҮКШ басқармасының төрағасы Құдайберген Қорғанбаевтың сөзінше, қазіргі уақытта 65,5 пайыз нысан дайын. Автономды қазандықтардың жалпы әзірлігі 71,1 процент, жылуы жүйелері – 92, сумен қамту желілері – 82,8 процент деңгейінде. Тараз, Жанатас, Қаратау мен Шудағы жылу желілерінде жөндеу жұмыстары аяқталып келеді.

Биыл энергетикалық кешендермен жылу маусымына әзірлік мақсатына 3,3 млрд теңге бөлінген. Оның 2,7 млрд теңгесі немесе 84 проценті игерілді.

Таразда «Жұмыспен қамту жол картасы» бағдарламасы аясында 18,6 шақырым жылу желілерінде жаңғырту мен ағымдағы жөндеу жұмыстары жүргізілуде. Жаңғыртуды қажет ететін жылу желілерінің 16,6 шақырымы алмастырылатын болады.

783 білім беру нысанының 647-сі (82,6 процент), 389 денсаулық сақтау нысанның 291-і (74,8 процент), 494 мәдениет нысанының 271-і (54,8 процент) жылу маусымына дайын.

Басқарма мамандары білім беру нысандарының жылу маусымына әзірлігін тексере келе бірқатар кемшіліктерді анықтады. Байзақ ауданында белгіленген кестеден 10 білім беру нысанындағы жөндеу жұмыстары кешігіп жатыр, Т. Рысқұлов ауданында – 8, Қордай мен Талас аудандарында – 3 нысанда ұқсас жағдай. Мерзімнен кешігудің себебі құбырлардың кеш келуімен байланысты дейді аудандардың әкімдері. Бердібек Сапарбаев:

— Бес күннен кейін оқу маусымы басталады. Балалар сабаққа қалай барады? Қазан айына дейін барлық жұмыстарды аяқтап үлгеру керек. Ұят емес пе, бір емес, бірнеше мектеп пен колледждер оқу маусымына дайын емес! – деп ашуланды.

Өңір басшысының жылыту маусымына әзірлікке де көңілі толмады. Жұмыстардың негізсіз созбалаңға түскенін атап өткен облыс әкімі аудан басшыларын жауапкершілік танытуға шақырды.

— Мерзімнен өте қатты кешігіп жатырсыздар. Жылыту маусымының басталуына бір жарым ай қалды. Білім беру мекемелерінде жөндеу-құрылыс жұмыстарын жедел түрде аяқтаңыздар! Карантиндік тәртіпті сылтаурату болмасын! – деп талап қойды облыс әкімі.

Қ. Қорғанбаевтың мәліметінше, қазір көппәтерлі тұрғын үйлердің жылу маусымына әзірлігі 55,8 процентті құраған, яғни 1 554 үйдің 867-сі дайын.

Биыл облыс орталығындағы 80 көппәтерлі үйді қайта жаңғырту жұмыстарына республикалық бюджеттен 3,4 млрд теңге бөлінген. Одан бөлек, 24 үйде күрделі жөндеу жүргізуге қосымша 1,1 млрд теңге қарастырылған.

Бердібек Сапарбаев атап өткендей, жұмыс атүсті атқарылмауы керек. Дайындық паспорты тек қағаз күйінде емес, іс жүзіндегі әзірлікпен айшықталуы қажет.

Құдайберген Қорғанбаев келтірген мәліметке сай, үш айда тұрғындар жылу қызметі үшін 337,1 млн теңге қарызға батқан. Оның ішінде «Таразэнергоорталығы» алдындағы берешек 328 млн теңге болса, «Жаңатас су-жылу» мекемесі – 4,3 млн, «Шу Жылу» мекемесі 4,8 млн теңгесін алмапты.

Тұтынушылардың «ЖамбылЖарықСауда-2030» ЖШС-нің алдындағы электр энергиясы үшін қарызы 518,1 млн теңгені құрайды. Тұрғындардың үш айдан аса уақыт ішіндегі энергетикалық кешендер алдындағы борышы 37,3 млн теңгеге жеткен.

Қ.Қорғанбаевтың айтуынша, облыстың бюджеттік ұйымдарының көмірге қажеттілігі 67,2 мың тоннаны құрайды, алайда оның әзірге тек 17,9 мың тоннасы ғана жеткізілген. Бүгінгі күнге дейін Талас және Т.Рысқұлов аудандары бұл іске әлі кіріскпеген. Аудан әкімдері аймақ басшысын көмірмен қамтамасыз етуде ешқандай мәселелер жоқтығына сендіруге тырысты. Көмір алдын-ала сатып алынбайды, өйткені ол сапасын жоғалтып, ыдырайды, өздігінен жану қаупі бар. Барлығы тамыз айында жағдайды түзетуге уәде берді.

Басқарма басшысы білім беру нысандары 1 қыркүйекке дейін, ал қалғандары 1 қазанға дейін толықтай көмірмен қамтамасыз етілуі тиістігін атап өтті.

— Тұрғындар үшін қатты отынның бағасы қатаң бақылауда болуы керек. Біз көмірді шахталардан түпкілікті тұтынушыға дейін тасымалдаудың нақты құнын білуіміз керек. Мұнда бағаның өсуіне жол берілмеуі қажет, — деп ескертті Бердібек Сапарбаев.

Бүгінгі күні газдандырылған елді мекендерде орналасқан облыстың 156 әлеуметтік нысандары көмірмен жылытылуда, өйткені аудан әкімдері бұл нысандарды газдандыру бойынша тиісті ұйымдастыру шараларын уақтылы қабылдамаған. Облыс әкімі жауапты басқармаларға әлеуметтік нысандарды газбен қамтамасыз ету үшін жобалық-сметалық құжаттаманы дереу әзірлеуді тапсырды. Өңір басшысы, ең алдымен, жылыту үшін көмірді пайдаланатын мектептердегі жылу жүйелерін қайта құру қажеттігін атап өтті.

— Барлық мектептерді газбен жылытуға көшіру керек. Мектептерді көгілдір отынға көшіру отынды жеткізу мен күлді шығару шығындарын азайтады, — деді Бердібек Сапарбаев аудан әкімдеріне.

— Жылыту маусымына қарай тіршілікті қамтамасыз етудің барлық құралдары, қазандықтар мен әлеуметтік нысандар уақтылы дайын болуы керек. Әлеуметтік нысандар мен тұрғындар 100 пайыз көмірмен қамтамасыз етілуі тиіс. Бұл кезең кедергісіз өтуі қажет, — деп атап өтті Бердібек Сапарбаев.

Сондай-ақ, жиында өңірлік кәсіпкерлер палатасының басшысы Самат Қосалиев «Бизнес-мектебі», «Аға сеньорлар» және «Бастау Бизнес» жобаларының қалай жүзеге асырылып жатқандығы туралы баяндады.

— Жалпы, 2017 — 2019 жылдары «Бастау Бизнес» жобасы аясында 7 670 адам оқытудан өтіп, 9,2 млрд.теңгеге 4 926 жоба жүзеге асырылған. Оны жүзеге асыру барысында салық түсімдері 43 млн. теңгені құрап, 14707 жұмыс орны құрылды. «Бизнестің жол картасы 2020» бағдарламасының 2779 қатысушысы қаржыландырылды, — деді С.Қосалиев.

Бүгінгі таңда жобалық кеңсе құны 70,5 млрд теңге болатын «Қарапайым заттар экономикасы» бағдарламасы аясында 182 жоба бойынша жұмыс жүргізілуде.

Сонымен бірге, С.Косалиевтің айтуынша, «Қарапайым заттар экономикасы» бағдарламасын іске асырудың бекітілген жоспарына сәйкес, облыста қолданыстағы жобалардан басқа, жалпы сомасы 55 млрд. теңгеге 516 жоба жүзеге асырылуы тиіс, бірақ іс жүзінде олардың 182-сі жұмыс істеуде. Атап айтсақ, Байзақ ауданында жоспарланған 47 жобаның 26-сы, Жамбыл ауданында — 45-тің 26-сы, Жуалыда — 44-тің 24-ті, Қордайда — 22-нің сегізі, Меркіде — 58-дің 15-і, Мойынқұмда-24-тің 10-ы, Т.Рысқұловта — 49-дың 17-сі, Сарысуда — 36-ның үшеуі, Таласта — 42-нің 27-сі, Шуда — 39-дың 11-і, Таразда — 110-ның 17-сі ғана жүзеге асырылуда.

«Еңбек» бағдарламасы бойынша облыстық бюджеттен 5,3 млрд. теңге бөлінген. Әзірге 3346 жобаны іске асыруға 1,8 миллиард теңге жұмсалыпты.

Кәсіпкерлер палатасы жергілікті атқарушы органдардан агроөнеркәсіптік кешен мамандықтары бойынша қысқа мерзімді кәсіптік оқыту құнын арттыру мәселесін бірнеше рет қарастыруды сұрағанымен, ол әлі күнге шешімін таппаған.

Облыс әкімі «Атамекен» кәсіпкерлер палатасы филиалының жетекшісі Самат Қосалиев пен «Даму» кәсіпкерлікті дамыту қоры филиалының директоры Бақытжан Исақовқа «Бизнестің жол картасы» бағдарламасын жүзеге асыруға ерекше назар аударуды және ағымдағы жылы аймақтағы отандық өндірістің үлесін  64 пайызға, ал таяу жылдары 90 пайызға дейін арттыру үшін арттыру үшін кәсіпкерлерге жан-жақты қолдау көрсетуді тапсырды.

Leave A Reply

Your email address will not be published.