"Отағасы туралы заң керек" : Бәпидің ұсынысын естіген депутаттар қол шапалақтап жіберді
Мәжіліс депутаттары бүгін қоғамда әкенің рөлі азайып кетті дейді
Бүгін Мәжілістің жалпы отырысында әйелдер мен балалардың құқығын қорғайтын заң жобасы талқыланды. Сұрақ-жауап барысында депутат Ермұрат Бәпи ер-азаматтардың рөлі төмендеп бара жатқанына алаңдап, отағасы туралы заң қабылдауды ұсынды, деп хабарлайды jambylinfo.kz.
Ермұрат Бапи Қазақстан Республикасының кейбір заңнамалық актілеріне әйелдердің құқықтары мен балалардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы» заң қоғамдағы әке рөлін "сүмірейтіп жіберді" дейді.
"Әкелерді бұл заңмен сүмірейтіп жіберген жоқпыз ба? Осы залда отырғандардың көшілігі "әкең келе жатыр, әкең сазайыңды береді" деген тәрбиемен өстік қой. Осы тұрғыдан келгенде, сіз қалай ойлайсыз, әкенің, ер-азаматтың рөлін көтеру үшін бәлкім отағасы туралы заң қабылдауымыз керек шығар", - дейді Бәпи. Осы сәтте залда отырған халық қалаулылары қол шапалақтап жіберді. Заң жобасы бойынша баяндама жасаған депутат Жұлдыз Сүлейменова әріптесінің ұсынысын қолдады.
Сүлейменова да әкелер мен ер-азаматтардың болашағына алаңдайтынын айтады.
Мәжіліс спикері Ерлан Қошанов Бәпиге бүгін қаралып жатқан заң жобасы ерлердің де құқығын қорғайтынын айтты. "Егер отағасы жәбір көріп жатса, бұл заң оны да қорғайды. Бәріне бірдей", - дейді Мәжіліс төрағасы.