Аудит қорытындысы: Шуда бюджет қаржысы тиімсіз жұмсалған
Сонымен қатар жобаларға бөлінген қаражат бойынша біршама бұзушылықтар анықталған
Тексеру комиссиясының кезекті отырысында Шу ауданында жасалған аудит қорытындысы айтылды, деп хабарлайды Jambylinfo.kz
Жиында баяндама жасаған комиссия мүшесі Асылхан Шаймерденов ауданда орын алған қаржылық бұзушылықтар жөнінде бірқатар дерек келтірді. Оның сөзінше, аудит жұмыстары 18 мемлекеттік мекеме мен 2 кәсіпорында жүргізілген. Осылайша 140 бюджеттік бағдарлама бойынша 2022-2024 жылдар аралығында бөлінген 24, 2 млрд қаражат қамтылып, 10 млрд 24, 9 млн теңгені құрайтын бұзушылықтар анықталған. Мұны баяндамашы «аталған жағдай бюджет жүйесінің негізділік қағидаттарының бұзылуынан орын алды», дейді.
Сондай-ақ Шу ауданы әкімдігінің тұрғын үй-коммуналдық шаруашылық, жолаушылар көлігі және автомобиль жолдары бөлімі басшысына әкімшілік құқық бұзушылық туралы 3 хаттама толтырылыпты. Бұдан бөлек, мемлекеттік аудит объектілерінің 6 қызметкері бұзушылықтарға жол бергені үшін тәртіптік жауапкершілікке тартылған. Комиссия мүшесі процестік шешім қабылдау үшін 74 материалдар тиісті аудиторлық дәлелдемелерімен бірге рәсімделіп, ішкі мемлекеттік аудит департаментіне 47 материал, мемлекеттік сәулет-құрылыс бақылау басқармасына 24 материал жолданғанын айтты. Аудан әкімі Бақытжан Жәнібеков аталған мәселелерге қатысты түсініктеме берді. Шенеунік құжаттама мен рәсімдеу жұмысынан кемшіліктер кеткенін мойындайтынын айтып, алдағы уақытта жол бермеу бойынша жұмыстар жасалып жатқанын жеткізді.
Отырыс қорытындысы бойынша аудиттер арасында бұзушылықтарды жою және ауданның тұрақты әлеуметтік-экономикалық дамуын қамтамасыз ету үшін ұсынымдар берілді.