Рамазан айы: Таразда сотталғандар қолөнер бұйымдарын мешітке сыйлады
Игі шара алдағы уақытта да жалғасын таппақ
Қасиетті Рамазан айының құрметіне орай Қылмыстық атқару жүйесі департаментінің облыс бойынша №58 мекемесінің сотталғандары жасаған қолөнер бұйымдары «Әл-Әділ» мешітіне сыйға берілді, - деп хабарлайды Jambylinfo.kz
Игі шараға мекеменің сотталғандардың еңбегін ұйымдастыру бөлімі инспекторы, әділет аға лейтенанты Асыл Әуен мен теологиялық оңалту жұмыстарын ұйымдастыру тобының инспекторы, әділет лейтенанты Бексұлтан Бекмолдаев ұйытқы болды.
Сотталғандар өз қолдарымен ағаштан ойып, қиюластырып жасаған бұйымдарын қасиетті айда мешітке тарту етуді жөн көрген. Бұл олардың түзелу жолындағы ізгі ойларының, қоғамға пайдасын тигізуге деген талпынысының бір көрінісі.
Өз кезегінде «Әл-Әділ» мешітінің имамы бұл сыйлықтардың рухани маңыздылығына тоқталып, игі іске атсалысқан жандарға ризашылығын білдірді.
Сотталған азаматтардың қолынан шыққан бұйымдар мешіт аумағында қолданылып, жамағаттың игілігіне жарамақ. Бұл – олардың қоғамнан шет қалмағанының, керісінше, пайдалы іске атсалысып жатқандығының айғағы.
Игі шара алдағы уақытта да жалғасын таппақ.