«Әулиеата үздігі» облыс әкімінің жастар сыйақысының иегерлері анықталды

«Әулиеата үздігі» облыс әкімінің жастар сыйақысының иегерлері мен «Тәуелсіздік ұрпақтары» грантының жеңімпаздары марапатталды, деп хабарлайды Jambylinfo.kz
 Іс-шараның басты мақсаты үздік жастарды ынталандыру, облыс жастарының азаматтық және қоғамдық-саяси белсенділігін арттыру, әртүрлі салада жетістікке жеткен жастарды көтермелеу және қолдау. 
Салтанатты шарада облыс әкімі Ербол Шырақпайұлы жеңімпаздарға өз алғысын білдіріп, арнайы құттықтау сөзін жеткізді.

«Әулиеата үздігі» облыс әкімінің жастар сыйақысы 2018 жылдан бастап дәстүрлі түрде табысталып келсе, «Тәуелсіздік ұрпақтары» гранты 2023 жылдан бастап берілуде. Марапат иегерлері әртүрлі номинация бойынша үздік деп танылды. Әріптесіміз, облыстық «Aq Jol» газетінің тілшісі Арайлы Жақсылық «Үздік жас ақын» номинациясын жеңіп алды. Айта кетейік жас ақын «JAS» өлеңдер жинағының авторы. Сонымен қатар «Еуразия+ОРТ» ЖШС телеарнасының тілшісі Ұлдана Жұбай «Үздік жас журналист» номинациясы, Тараз қаласы Әлихан Бөкейханов атындағы №1 гимназиясы директорының орынбасары Дәурен Естаев «Үздік жас педагог» номинациясы иегері атанды. Бокстан жастар арасындағы әлем чемпионы Бексұлтан Боранбай «Үздік жас спортшы», Жамбыл аудандық орталық ауруханасының «Айша бибі» дәрігерлік амбулаториясының аға мейірбекесі Бикен Аманғалиқызы «Үздік жас медицина саласының маманы», облыстық филармонияның Ұлт аспаптар оркестірінің әртісі, концертмейстер, халықаралық және республикалық өнер додаларының жеңімпазы Дидар Басықараев «Үздік жас өнер саласының маманы», Тараз қаласы №20 өрт сөндіру бөлімінің қарауыл бастығы Байдәулет Дүйсенов «Үздік жас құтқарушы» номинациялары бойынша үздік болды. Сондай-ақ облыстық полиция департаментінің ауданаралық есірткі қылмысына қарсы іс-қимыл бөлімінің аға жедел уәкілі, полиция капитаны Құндызай Бөгенбаева «Үздік жас құқық қорғау қызметкері», Талас ауданы әкімдігінің ішкі саясат бөлімінің сектор меңгерушісі Батырхан Төмешбай «Үздік жас мемлекеттік қызметші», «Амангелді газ өңдеу зауыты» ЖШС-ның Тараз қалалық филиалының «Сынақ зертханасының» аға зертханашысы Салтанат Займанова «Үздік жас өндіріс саласының маманы», Канадалық MaintainX» Старт Ап компаниясының қызметкері, жастарға арналған Брайль қаріпіндегі «Дәрігер реинкарнациясы» кітабының авторы, «KINGMAKERS GROUP» креативті белсенді жастар тобының жетекшісі Мұхтарәлі Әбуәлі «Үздік жас өнертапқыш» номинациясының жеңімпазы атанды. Ал «Тәуелсіздік ұрпақтары» грантының иегерлеріне тоқталар болсақ. Резеңке төсеніштерді өндіру жобасының авторы Дәулет Жаманқұл «Ғылым» бағыты бойынша,  «Қазағымның дауысы» дыбыс жазу бөлмесін ашу» жобасымен Аяна Ким мен «Анимация орталығы» - аниматорлық театрландырылған қойылымдар көрсету жобасымен Ақарыс Сайлау «Мәдениет» бағыты бойынша үздік болды. Сол секілді «Ақпараттық технологиялар» бағыты бойынша «Robo Park Taraz» жобасының авторы Әлихан Әділ, «Бизнес» бағыты бойынша «Микрозелень өсіру және топырақсыз өсіру» жобасының жетекшісі Патима Байтұрсын мен «KOMEK AI» жобасымен Азамат Нәмелбек, «Медиа» бағыты бойынша «TARIHI TRUE» Әулиеаталық сапар» жобасының авторы Мерей Бает пен Жастарды әскери патриоттық рухта тәрбиелеуге бағытталған «TIK-TOK хаус» жобасының авторы Ерқасым Әбдірахман жеңімпаз деп танылды. Марапат иелеріне арнайы диплом мен статуэтка, және қаржылай сыйақы табысталды. Салтанатты шара соңында жас ақын Арайлы Жақсылық отты жырларын арнап, жас былғары қолғап шебері Бексұлтан Боранбай ұйымдастырушыларға өз алғысын білдірді.