Алматылық дәрігер ұшақ бортында студенттің өмірін сақтап қалды
Шымкенттен Астанаға бағыт алған әуе рейсі кезінде 20 жастағы студент есінен танып, оған шұғыл медициналық көмек қажет болды
Бортсеріктер дереу әрекет етіп, ұшақта дәрігердің бар-жоғын сұрастырды, - деп хабарлайды Jambylinfo.kz
Осы сәтте бортта болған жоғары білікті реаниматолог, «Педиатрия және балалар хирургиясы ғылыми орталығы» АҚ-ның бөлім меңгерушісі, нейрохирург әрі кардиолог Нұрсұлтан Құрбанбеков жолаушыға алғашқы көмек көрсетіп, оның өмірін сақтап қалды.
Мамандардың айтуынша, студенттің жағдайы өте ауыр болған – оның импульсі әлсіз, ал қан қысымы мүлдем тіркелмеген. Жедел және үйлесімді әрекеттің арқасында бірнеше минут ішінде пациенттің жағдайы жақсарды. Дәрігерлер қандағы гемоглобин деңгейінің 61-ге дейін төмендегенін анықтады, бұл есінен танудың негізгі себептерінің бірі болуы мүмкін.
Министрлік пациенттің жағдайы тұрақтандырылғанын хабарлады.
«Пациенттің импульсі әлсіз, қан қысымы нөлдік деңгейде болған. Бұл - ауыр жағдайды білдіреді. Дәрігердің жедел және үйлестірілген іс-қимылының арқасында қыздың жағдайы бірнеше минуттан кейін жақсарды. Анамнезде қандағы гемоглобин деңгейі небәрі 61 екені анықталды және пациент емделмеген. Бұл - есін жоғалту себебінің бірі болуы мүмкін», - деп мәлімдеді Денсаулық сақтау министрлігі.