Бүгін Рақымжан Қошқарбаевтың Рейхстагқа ту тіккен күні
30 сәуір - Рақымжан Қошқарбаев Рейхстагқа ту тіккен күн.
Бүгін Ұлы Отан соғысының батыры, «Халық Қаһарманы» Рақымжан Қошқарбаевтың Рейхстагқа ту тіккеніне тура - 81 жыл толады.
1945 жылы дәл осы күні лейтенант Рақымжан Қошқарбаев жауынгер Григорий Булатовпен бірге Кеңес әскерлері арасынан алғашқылардың бірі болып Рейхстаг ғимаратына жетіп, Жеңіс туын тікті.
Рақымжан Қошқарбаев Ақмола облысы, Целиноград ауданы аумағында дүниеге келген. 1942 жылы әскер қатарына алынып, 1944 жылы Фрунзедегі жаяу әскер училищесін тәмамдаған. Сол жылдың қазан айынан бастап 1-Беларусь майданы құрамындағы 150-Идрицк атқыштар дивизиясында взвод командирі ретінде қызмет атқарып, Польша мен Германия аумағындағы ұрыстарға қатысқан.
1945 жылдың көктемінде Берлин операциясы кезінде ол жауынгерлерімен бірге алдыңғы шепте болып, Рейхстагқа жету тапсырмасын орындады. Бұл оқиға соғыс тарихында символдық мәнге ие тарихи сәттердің бірі ретінде бағаланады.
Соғыстан кейін Қошқарбаев кеңестік әскер бөлімдерінде қызмет атқарып, кейін Қазақстанға оралып, 1947–1967 жылдары Ақмола облыстық атқару комитетінде, Қазақ КСР Министрлер Кеңесі жанындағы құрылымдарда еңбек етті. 1967 жылдан бастап «Алматы» қонақ үйінің директоры болды.
Оның ерлігі ұзақ жылдар бойы ресми түрде толық мойындалмай келді. Тәуелсіздік жылдарынан кейін тарихи әділет қалпына келтіріліп, 1999 жылы Қазақстан Республикасының Жарлығымен оған «Халық Қаһарманы» атағы берілді.
Рақымжан Қошқарбаев 1988 жылы 10 тамызда Алматы қаласында қайтыс болды.
2007 жылы Ресейдің Әскери тарих институты 150-Идрицк атқыштар дивизиясының лейтенанты Рақымжан Қошқарбаев пен Григорий Булатовтың 1945 жылғы 30 сәуірде Рейхстагқа Жеңіс туын тіккені туралы деректі ресми түрде растады.
Бүгінде оның есімі — ерлік пен отансүйгіштіктің символы ретінде тарихта сақталып келеді.
