Байзақтағы 13 мектепті тамақпен қамтыған "Тоқсейітов" ЖК 229 миллион теңге тендер ұтқан

Жамбыл облысы Байзақ ауданында жетінші қараша күні балалар мен ересектер мектеп асханасындағы тамақтан уланып жаппай аурухана түскен. Бүгінде мектепте тамақтануға жауапты "Токсеитов" ЖК жұмысы толығымен тоқтатылғанын хабарлаған едік. Байзақ аудандық білім бөлімінің хабарлауы бойынша  кәсіпкер аудандағы 13 мектепті тамақпен қамту үшін жалпы соммасы 229 миллион 410 мың 817 теңге тендер ұтқан. Айта кетейік, ауданның орталық ауруханасына мектеп асханасында түскі ас ішкен 48 адам келіп түскен. Оның 35-і ауруханаға жатқызылды. Екеуі ересек, қалғаны — балалар. Балалардың көбі –  7-10 жас аралығындағы оқушылар.