Криштиану Роналду қарсыласы мен төрешіге қол көтерді
Португалиялық даңқты футболшы Криштиану Роналду матч кезінде жанжал шығарып, алаңнан қуылды. Бас төреші оған бірден қызыл қағаз көрсетті, -деп хабарлайды jambylinfo.kz. halyq-uni.kz-ке сілтеме жасап.
Бүгін Сауд Арабия Суперкубогының жартылай финалдық кезеңінде «Әл-Наср» мен «Әл-Хиляль» футбол клубтары кездесті. Нәтижесінде Роналду өнер көрсететін «Әл-Наср» 2:1 есебімен жеңіліп, жарыс жолын аяқтады.
Ойынның 86-минутында Роналду қарсыласымен алаңнын сыртына шығып кеткен допқа таласып, оны шынтағымен ұрып жіберді. Ойынның бас төрешісі Әл-Хоаиш португалиялықтың осы әрекеті үшін бірден қызыл қағаз көрсетті. Ал Криштиану ашуға булығып, оған да жұдырық ала жүгірді.
Айта кетсек, 11 сәуірде Сауд Арабия Суперкубогының финалында «Әл-Иттихад» пен «Әл-Хиляль» футбол клубтары күш сынасады. Бұл ойын Абу-Дабидегі «Мұхаммед бин Зайед» алаңында өтеді.