Ұлыбритания Украина қауіпсіздігін қолдау үшін әскер жіберуге дайын
Ұлыбритания премьер-министрі Кир Стармер Лондонның Украинаның қауіпсіздік кепілдіктерін қамтамасыз етуде жетекші рөл атқаратынын мәлімдеді
Ол Ұлыбританияның бітімгерлік миссия аясында Украинаға әскер жіберуге дайын екенін атап өтті, - деп хабарлайды Jambylinfo.kz DW агенттігіне сілтеме жасап.
— Бұл біздің Украина қарулы күштеріне қосымша қолдау көрсетуге деген міндеттемемізді білдіреді. Ұлыбритания 2030 жылға дейін жыл сайын үш миллиард фунт бөледі. Біз әскерилерімізді орналастыру арқылы қауіпсіздік кепілдіктеріне өз үлесімізді қосуға дайынбыз. Бұл шешімді жеңіл қабылдаған жоқпын, өйткені британ әскерилерінің қауіп-қатерге ұшырауының жауапкершілігін толық сезінемін. Бірақ Украина қауіпсіздігіне қолдау көрсету – бүкіл Еуропаның тұрақтылығына ықпал етеді, — деді Стармер.
Стармердің айтуынша, бұл тек Украина тағдыры емес, бүкіл Еуропаның қауіпсіздігіне қатысты мәселе. Ол Ресей президенті Владимир Путиннің агрессиясын тоқтату үшін Украинада тұрақты бейбітшілік орнату маңызды екенін атап өтті.
Сондай-ақ, британ премьері "АҚШ қана Путинді тоқтата алады" деген пікірін білдіріп, жақын күндері Дональд Трамппен кездесуді жоспарлап отырғанын айтты. Бұл мәселе 17 ақпанда Парижде өтетін Украинаға арналған шұғыл саммитте көтерілмек. Саммитке НАТО бас хатшысы Марк Рютте де қатыспақ.
– Мен Парижге нақты хабарламамен барамын, бұл біздің еуропалық достарымызға арналған. Біз өзіміздің қорғанысымызға шынайы көңіл бөлуіміз керек және өз жүктемемізді көтеруіміз қажет. Біз бұны ұзақ уақыт бойы талқыладық, — деді Стармер.
Ол НАТО-ға мүше еуропалық елдерді қорғаныс шығындарын арттыруға және Ресейге қарсы санкцияларды күшейтуге шақырды. Әсіресе, Мәскеудің мұнай экспорты мен санкцияларды айналып өтетін банктеріне қатысты қатаң шаралар қабылдау қажеттігін айтты.
Ал АҚШ Мемлекеттік хатшысы Марко Рубио Украина мен Еуропа Мәскеудің соғысты тоқтату туралы кез келген нақты келіссөздерге дайын екенін жеткізді. Сарапшылар бұл қадамды "Путиннің бейбітшілікке деген шынайы ниетін тексеру" деп бағалап отыр.
Айта кетейік, АҚШ пен Ресей өкілдері жақын күндері Сауд Арабиясында Украинадағы үш жылдан бері жалғасып келе жатқан соғысты тоқтату мақсатында кездесу өткізеді деп күтілуде.