Ел сенімі – даму серпіні

52

Мемлекетіміздің бүгінгі жетістіктері елімізде азаматтық қоғамның қалыптасуымен тығыз байланысты. Осы орайда әлеуметтік бастамалардың жүзеге асуына қоғамдық ұйымдардың қосар үлесі зор. Шын мәнінде мемлекетіміздің өсіп-өркендеуі, қоғамдық сананың жаңғыруы азаматтардың белсенділігі арқылы жүзеге асатыны анық. Үкіметтік емес ұйымдардың басты мақсаты – халықпен тығыз байланыста болу. Осы ретте бүгін Жамбыл облысы әкімдігінің ішкі саясат басқармасының ұйымдастыруымен «Азаматтық қоғам және мемлекет: серіктестік пен дамуға 30 жыл – #BIRGEMIZ:» атты өңірдегі үкіметтік емес ұйымдарының форумы өтті.

Белсенді қоғам белсенділерін біріктіретін, екі жылда бір ұйымдастырылатын  дәстүрлі ауқымды іс-шара  «Қоғамдық келісім» КММ ғимаратында өтті. Жалпы елімізде үкіметтік емес ұйым секторы тәуелсіздік алған жылдардан бері бірге дамып келе жатқан азаматтық қоғам институттарының бірі. Десек те соңғы уақытта ҮЕҰ рөлі арта түскеніне ел куә. Қоғамда аталмыш сектордың дамуына қолайлы жағдай жасалып, барлық мүмкіндіктер қарастырылуда. Себебі, әрбір мемлекеттің сенімді тірегі – азаматтық қоғам. Мемлекет басшысы Қасым-Жомарт Тоқаев Қазақстан халқына жолдаған Жолдауында да азаматтық қоғамды дамыту және үкіметтік емес ұйымдардың беделін арттыру жайлы баса айтты. Бүгінде ҮЕҰ әлеуетін арттыру және мемлекет пен коммерциялық емес ұйымдардың өзара іс-қимылын күшейту жұмыстары әлі де өзекті болып отырғаны анық.

Азаматтық қоғам неғұрлым белсенді болса, соғұрлым халықтың өмір сүру сапасы да жақсармақ. Осы ретте ұйымдастырылған форумды облыс әкімі Бердібек Сапарбаев онлайн форматта ашып беріп,  азаматтық қоғамның белсенді бөлігі болып отырған үкіметтік емес ұйымдардың ауқымды жұмыстарын да тілге тиек етті.

– Қазақстанның тұрақтылығы мен демократиялық дамуының негізі ретінде сындарлы қоғамдық диалог құруға аса маңызды мән беріледі.Оның бір айғағы – осы ұйымдастырылып жатқан үкіметтік емес ұйымдардың форумы.Үкіметтік емес ұйымдар үшін маңызы зор осы іс-шараға қатысып отырғандарыңыз үшін ең алдымен алғысымды білдіремін.Бүгінгі күні азаматтық қоғамның үлкен әлеуметтік және саяси қозғаушы күшке айналғаны ақиқат.Үкіметтік емес сектор әлеуметтік мәселелерді шешуде және азаматтық бастамаларды жандандыруда мемлекеттің сенімді әріптесі деп нақты айтуға болады. Облыста бүгінгі күнге 6 саяси партия, әртүрлі бағыттағы 894 ҮЕҰ, 11 конфессияның мүддесін білдіретін 356 діни бірлестік, әртүрлі меншік нысанындағы 82 БАҚ, 12 қоғамдық кеңес, 122 мыңнан астам ұйымды қамтитын 15 салалық кәсіподақ бірлестігі ресми түрде тіркелген. Мемлекет басшысы атап өткендей, бүгінде үкіметтік емес ұйымдар қоғамдағы әлеуметтік тұрақтандыруда үлкен үлес қосуда.Атап айтқанда, өңірімізде коронавирустық инфекцияның таралуын болдырмау және алдын-алу мақсатында облыстағы қоғамдық бірлестіктері азаматтық белсенділік танытып, «Біз біргеміз» республикалық акциясы аясында 25 600 адамға 160 млн теңгеге түрлі қайырымдылық шараларын ұйымдастырды. Бұл көрсеткіш әлі де дейін өсуде.Одан басқа, Жамбыл облысы елімізде алғашқылардың бірі болып техногенді апаттан зардап шеккен Түркістан облысы Мақтаарал ауданы тұрғындарына 10 млн 160 мың теңге және
40 тоннадан астам гуманитарлық көмегін жөнелтті.Сонымен қатар, қоғамдық қорлар арқылы қаражат жиналып, оттегі концентраторлар мен медициналық қорғаныш костюмдері денсаулық сақтау мекемелеріне таратылды. Таразда қаласы мен аудандардағы ауруханалардың емделушілер мен медицина қызметкерлері үшін кәсіпкерлер, қоғамдық ұйымдар тарапынан ыстық тамақ дайындалып таратылды. Жоғарыда айтылған мәселелер бұл саладағы он тенденцияны көрсетеді және азаматтық сектор адамдарға, олардың нақты мәселелеріне барынша жақын екендігін дәлелдейді. Айтып өткен жөн, мемлекет тарапынан азаматтық сектормен өзара әрекеттестікті нығайту үшін көптеген шаралар қабылдануда.Биылғы жылы Мемлекет басшысы «Қазақстан Республикасында азаматтық қоғамды дамыту тұжырымдамасы туралы» Жарлыққа қол қойып, мемлекеттік бағдарламалар мен бастамаларды әзірлеуге және іске асыруға қоғамның қатысу жүйесін дамыту, мемлекеттік әлеуметтік-экономикалық саясатын жетілдіруге жәрдемдесу, мемлекеттің, бизнестің және азаматтық қоғамның әріптестік жүйесін нығайтуға жаңа серпін берді. Осылайша, мемлекеттің бүгінгі жетістіктерін елдегі бірлік пен татулықтың жемісі деп бағалай отырып, халықтың әл-ауқатын көтеруге бағытталған бастамалар елдің дамуына серпін беретіндігіне сенімім мол,-деді өз сөзінде аймақ басшысы Бердібек Машбекұлы.

Бұдан әрі  Zoom платформасы арқылы ҚР Ақпарат және қоғамдық дамыту вице-министрі Болат Тлепов,  Қазақстан Азаматтық альянсының президенті  Бану Нұрғазиева сөз тізгіндеп, ҮЕҰ мен мемлекеттің өзара іс-қимылының жаңа форматтары турасында ойларын ортаға салса, пікірсайыс алаңдарында қоғам мен мемлекет диалогы, әлеуметтік тұтастық: әл-ауқаттың даму векторы бағыттарында пікірлер талқыланып, ұтымды ұсыныстар айтылды. Сонымен қатар, форумда «Рухани жаңғыру» бағдарламасы аясында туған өлкені түлетіп, мұқтаж жандарға көмек қолын созған, қайырымды жандардың игі ісін жалғастырған азаматтарды ұлықтайтын «Жомарт жүрек» сыйлығының лауреаттары марапатталды. Атап айтқанда Тоқтасын Блалиев «Жыл тұлғасы» номинациясын, Серік Олжабеков «Жылдың үздік ұйымы» номинациясын, Камшат Малдыбекова «Туған өлке» номинациясын, Михаил Платов «Ерен еріктілік» номинациясын,Бақтияр Тоғайбаев «Жыл меценаты» номинациясын иеленді. Осы секілді тағы бірқатар азаматтар мен  қоғамдық ұйымдарға «Халық алғысы» медалі мен облыс әкімінің Алғыс хаты табыс етілді. Сонымен қатар «ASAR» әлеуметтік бизнес жобаларының жеңімпаздарына минигранттар үлестірілді.