Жамбылда “Аңсаған сәби” бағдарламасы іске асырылғалы 63 бала дүниеге келген

0 82

Мемлекет Басшысы Қасым-Жомарт Тоқаевтың тапсырмасымен еліміздегі демографиялық ахуалды жақсарту мақсатында «Аңсаған сәби» арнаулы бағдарламасы іске қосылған болатын. Бағдарламаның мақсаты – қосалқы репродуктивті технологиялардың көмегімен отбасылық-демографиялық мәселелерді шешуге жәрдемдесу. Осы орайда «Экстракорпоральды ұрықтандыру» бағдарламасымен өткен жылы квота саны 7 мыңға дейін көбейтілді. Жамбыл облысына оның 401-і бөлінген.
«Жалпы өңірде «Аңсаған сәби» бағдарламасы іске асырылғалы 63 бала дүниеге келді. Ал, биылғы бірінші жартыжылдықта 330 квота игерілді. Жүктілік 58 науқаста болған. Яғни 34,3 пайыз. 82 науқаста теріс нәтиже болған. О баста 161 науқас жоспарланған. Қазір өңірде бедеулігі бар науқастар үшін квоталарды бөлу жөніндегі комиссия құрылып, жұмыс істеп келеді. Барлық аудандар мен қалалық емханаларда жауапты мамандар тағайындалып, қосалқы репродуктивтік технологиялар қызметін көрсетуге қатысатын медициналық ұйымдар анықталған»,-дейді Жамбыл облыстық денсаулық сақтау басқармасы,Ана мен баланы қорғау бөлімінің басшысы Алтынай Махатова.
Айта кетейік, «Аңсаған сәби» бағдарламасы 2025 жылға дейін жалғаспақ. Алдағы үш жылда мемлекет жыл сайын 7 мың отбасына бала сүю бақытын сыйлауды жоспарлап отыр. Сала мамандары бұл бастамаға кез-келген жұптың қатыса алатынын айтады.

Leave A Reply

Your email address will not be published.