Жамбылда жолдар жабылады
Бұл туралы Жамбыл облыстық Полиция департаментінің баспасөз қызметі хабарлады
Жамбыл облысында ауа райының нашарлауына байланысты полиция қызметкерлері ескерту жасады, деп хабарлайды Jambylinfo.kz.
"Жамбыл ауданы Айша-бибі ауылынан Түркістан облысының шекарасына дейінгі аралықта сағат 18:00-ден бастап қала сыртындағы трассаларда желдің күшеюіне, қар аралас жауын-шашынның түсуіне, ауа-райының өзгеруіне байланысты айналаның көрінуі нашарлап, сондай-ақ жолдағы көктайғаққа байланысты жүк көліктері үшін қозғалыс уақытша тоқтатылды", -делінген хабарламада.
Сонымен қатар, Жамбыл облысының Полиция департаменті көлік жүргізушілеріне аса қажеттілік болмаса алыс жолға шықпауды ескертт.
"Алыс жолға шығар алдында көліктің техникалық жағдайын тексеріп, қашықтық пен жылдамдық режимін сақтау керек.
Жаяу жүргіншілер өткелінен өткенде аса мұқият және абай болыңыз, жол қозғалысы ережелерін қатаң сақтаңыз! Бұған қоса, міндетті түрде ауа-райының жағдайы туралы және көлік құралдарының қозғалысын шектейтін ескертулерге назар аударыңыз. Автокөлік трассада бұзылған жағдайда "102" тетігіне қоңырау шалу қажет", -деп жазылған ведомствоның хабарламасында.