1 маусым – Халықаралық балаларды қорғау күніне орай А.Н. Сызғанов атындағы Ұлттық ғылыми хирургиялық орталықта бауыр трансплантациясынан өткен балаларға арналған қайырымдылық акциясы өтті, деп хабарлайды Jambylinfo.kz 

Бұл – елімізде балаларға бауыр трансплантациясын жүргізетін жалғыз медициналық мекеме. Акция барысында балалар ультрадыбыстық зерттеуден (УДЗ), кешенді зертханалық талдаулардан өтті, сондай-ақ бейінді мамандардың консультациясын алды.

Орталықтың басқарма төрағасы, медицина ғылымдарының докторы, профессор, ҚР ҰҒА академигі Болатбек Бимендеұлы Баймаханов балалармен кездесіп, олардың жағдайын сұрап, мерекелік көңіл-күй сыйлады. Ол орталықтың барлық мамандары бұл балалардың денсаулығын үнемі бақылауда ұстайтынын атап өтті.

«Ата-аналарының жанында қайта өмірге келген қуанышты балаларды көру – біз үшін үлкен бақыт. Бұл бізді трансплантология мен жоғары технологиялы медицинаның жаңа белестерін бағындыруға жігерлендіреді», – деді орталық басшысы.

А.Н. Сызғанов атындағы орталықта балаларға бауыр трансплантациясын жасау бағдарламасы 2016 жылы профессор Баймахановтың бастамасымен қолға алынған. Содан бері 50-ден астам бала күрделі операцияны сәтті өткеріп, толыққанды өмір сүруге мүмкіндік алды.