Еуразиялық экономикалық комиссия Кеңесі дәрілік заттарды әр елдің ұлттық заңнамасы бойынша тіркеу мүмкіндігін 2027 жылдың 31 желтоқсанына дейін ұзарту туралы шешім қабылдады, - деп хабарлайды Jambylinfo.kz 

Бұл өзгеріс ЕАЭО елдеріндегі, соның ішінде Қазақстандағы фармацевтикалық компанияларға жаңа препараттарды бұрынғы тәртіппен тіркеуді тағы үш жылға дейін жалғастыруға мүмкіндік береді. Сондай-ақ бұрын тіркелген дәрі-дәрмектерге өзгерістер енгізу де бұрынғы қағидалармен жүзеге асырыла береді.

Мұндай шешім денсаулық сақтау жүйесінде дәрі-дәрмек тапшылығы мен жеткізілімдегі үзілістердің алдын алуға бағытталған. Мерзімді ұзарту халықты қажетті препараттармен үздіксіз қамтамасыз етуге жағдай жасайды.

Аталған өзгерістер 2022 жылғы 10 маусымдағы ЕЭК Кеңесінің №96 шешіміне енгізілген және 2024 жылдың 24 мамырынан бастап күшіне енеді. Олар 2025 жылдың 1 қаңтарынан кейін пайда болатын құқықтық қатынастарға қолданылады.