Астанада өткен «Қазақстан – БАӘ» бизнес-форумында ауыл шаруашылығы саласына қатысты ірі инвестициялық жоба жария етілді, - деп хабарлайды Jambylinfo.kz 

Қазақстан Республикасы Ауыл шаруашылығы министрлігі мен «Qazaq Arab Sugar» ЖШС арасында елімізде қант зауытын салу туралы келісімге қол қойылды.

Құны 580 миллион АҚШ долларын құрайтын бұл жоба жылына 500 мың тоннаға дейін қант өндіруге мүмкіндік береді. Сонымен қатар, зауыт іске қосылғанда 800 жаңа жұмыс орны ашылады.

Бұл бастама Мемлекет басшысы Қасым-Жомарт Тоқаев пен Абу-Дабидің тақ мұрагері шейх Халед бен Мұхаммед бен Заид Әл Нахаянның қатысуымен өткен форум аясында жүзеге асып отыр. Форум барысында екі елдің энергетика, логистика, қаржы, ауыл шаруашылығы және технология салаларындағы ынтымақтастығын тереңдетуге бағытталған 9 келісімге қол қойылып, жалпы құны 5 млрд АҚШ долларын құрайтын жобалар талқыланды.