Таразда Жамбыл облысының әкімдігі мен «G-Global» халықаралық хатшылығы арасында өзара ынтымақтастық туралы меморандумға қол қойылды. Тараптар G-Global платформасында тұрақты әлеуметтік-экономикалық өсім, инвестицияларды тарту, қоршаған ортаны қорғау, жасыл экономика, туризм және экотуризм саласында бірлескен іс-шаралар өткізуге дайын екендіктерін растады.

Жамбыл облысы әкімдігінің атынан меморандумға аймақ басшысы Бердібек Сапарбаев, «G-Global» хатшылығынан – оның басшысы Серік Нөгербеков қол қойды.

Қонақтар өздерінің екі маңызды жобаларын таныстырды. Олардың біріншісі  – делдалдарды араластырмай, түрлі мақсаттағы тауарларды өндірушіден тұтынушыға тікелей жеткізуді мақсат еткен «Sirius market» экожүйесін тестілік режимге енгізу. Екінші жоба – қазіргі заманғы әдіснаманы қолдана отырып, амбулаториялық жағдайда онкологиялық аурулармен ауыратын науқастарды емдеу.

– Біз өңіріміздің әлеуметтік-экономикалық дамуына бағытталған жобаларды әрдайым қолдаймыз. Бізге жаңа идеялар мен жаңа технологиялар қажет. Бізде ауқымды инвесторлармен жұмыс тәжірибесі бар. Біз сіздердің ұсыныстарыңызды жүзеге асыруға көмек көрсетуге дайынбыз, – деді Б.Сапарбаев.