Прокурордың шағымы бойынша «Қорғас» Шекара маңы ынтымақтастығы халықаралық орталығының багаж терминалы мемлекет меншігіне қайтарылды, деп хабарлайды jambylinfo.kz.

Дереккөзге сүйенсек, 2018 жылы аумағы  «Қорғас» Шекара маңы ынтымақтастығы халықаралық орталығының 900 м2-ден асатын багаж терминалы 90 млн теңгеге сатылып кеткен.

«Кейіннен 2023 жылы оның астындағы 1,9 га жер учаскесін 500 мың теңгеге уақытша пайдалануға қосымша сатып-алу шарты жасалды. Алайда тараптар мүлікті сату ережелерін сақтамаған, мүлікті бағалау бекітілген стандарттарды өрескел бұза отырып жүргізілген. Оның үстіне жер телімін иеліктен шығару ғимарат сатылған соң 4 жылдан кейін жүзеге асырылған», - деп хабарлады прокуратура.

Осыған байланысты прокурорлар бұл активтерді мемлекет меншігіне қайтару үшін сотқа жүгінді.
Жетісу облысының мамандандырылған ауданаралық экономикалық соты бұл арызды қанағаттандырған.