Жаңа оқу жылының басталуына аз уақыт қалды. Осыған орай мемлекет аз қамтылған және мұқтаж отбасылардың балаларына қолдау көрсетуді жалғастыруда, деп хабарлайды Jambylinfo.kz 

«Жаңа оқу жылы қарсаңында мемлекеттің қолдауына мұқтаж балалардың барлығына дер кезінде материалдық және әлеуметтік көмек көрсетілуі тиіс», — деді Олжас Бектенов.

Премьер-министр ол үшін биыл 23 млрд теңгеден астам бюджет қаражаты көзделгенін атап өтті. Бұл кемінде 500 мың баланы әлеуметтік қолдауға мүмкіндік береді.

«Өңір әкімдері осы жұмысты бақылауға алсын. Сондай-ақ Оқу-ағарту министрлігі өңір әкімдіктерімен бірге 1 қыркүйекке дейін барлық оқушыны оқулықтардың толық жиынтығымен қамтамасыз етсін. Мектептегі тамақтандыру сапасы балалардың денсаулығы мен дамуы үшін маңызды бағыт саналады. Денсаулық сақтау министрлігі мен өңір әкімдіктері тамақтандыру стандарттары мен санитариялық нормалардың сақталуына бақылауды күшейтуі қажет», — деп атап өтті Олжас Бектенов.