Батыс Қазақстан облысында көктемгі су тасқынының алдын алу мақсатында бірқатар өзендерде жарылыс жұмыстары жүргізілді, деп хабарлайды Jambylinfo.kz 

Бұл шаралар өзендердегі мұз кептелістерін болдырмауға бағытталған.

Облыс аумағындағы Орал қаласында, сондай-ақ Ақжайық, Бәйтерек, Жәнібек, Сырым және Тасқала аудандарында орналасқан Шаған, Деркөл, Жақсыбай және Өлеңті өзендерінде мұзды жару жұмыстары атқарылды. Мамандардың айтуынша, мұндай шаралар көктемгі қар еру кезеңінде судың еркін ағуын қамтамасыз етуге мүмкіндік береді.

Жүргізілген жарылыс жұмыстарының жалпы аумағы 23 мың шаршы метрден астам аумақты қамтыды. Бұл өз кезегінде өзендердегі мұз кептелісінің алдын алып, елді мекендерді су басу қаупін азайтуға бағытталған.