Бұл туралы Ұлттық экономика министрі, вице-премьер Серік Жұманғарин депутаттық сауалға берген жауабында айтты, - деп хабарлайды Jambylinfo.kz 

Қазақстанда Apple, Amazon, Alibaba, Aliexpress, Adobe, Ebay, Google, iHerb, Huawei, Meta (Facebook, Instagram), Netflix, Nintendo, Pinduoduo, TaoBao, TikTok, Temu, Samsung, Sony және Zoom сияқты 105 шетелдік компания тіркелген. Бұл маркетплейстер өз өнімдері мен қызметтерін Қазақстаннан тыс жерде ұсынады. Ал еліміздің заңнамасы тек оның аумағында әрекет етеді.

"Сондықтан шетелдік маркетплейстердің қазақстандық платформалар мен өндірушілермен ынтымақтастық орнатуын міндеттеу мүмкін емес", – деді Жұманғарин.

Сонымен қатар, ол жаңа Салық кодексі жобасында шетелдік маркетплейстердің салық төлеу тәртібін реттейтін ережелер қарастырылғанын атап өтті.

"Егер маркетплейс ҚҚС төлеуші ретінде тіркелмесе немесе камералдық бақылау нәтижесінде анықталған бұзушылықтарды жоймаса, оның сайты бұғатталуы мүмкін", – деді министр.