Шу – Бурылбайтал республикалық маңыздағы автожолының бір бөлігі 13 мамырдан бастап ақылы болды, - деп хабарлайды Jambylinfo.kz 

Ақылы жолдың басталатын жері – 92,2-шақырым, ал аяқталатын жері – 268-шақырым. Жалпы ұзындығы – 175,8 шақырым. Жол II санатқа жатады, жолақ ені кемінде 3,75 метр.

Балама бағыт ретінде жүргізушілерге мына тегін жол ұсынылады: Шу – Қайнар – Кенен – Қарабастау – Қаншенгель – Ақсуек – Бурылбайтал.

Жеңіл көліктерден ақы алынбайды. Ал автобустар мен жүк көліктері үшін айлық және жылдық абонементтер қарастырылған:

16 орынға дейінгі автобустар мен 2,5 тоннаға дейінгі жүк көліктері – 1213 теңге, алдын ала төлем жасағандарға – 1031 теңге;

32 орынға дейінгі автобустар мен 5,5 тоннаға дейінгі жүк көліктері – 2446 теңге, алдын ала төлеммен – 2082 теңге;

32 орыннан жоғары автобустар мен 10 тоннаға дейінгі автопоездар – 3659 теңге, алдын ала төлеммен – 3114 теңге;

10–15 тонна аралығындағы жүк көліктері – 4891 теңге, алдын ала төлеммен – 4156 теңге;

15 тоннадан жоғары жүк көліктері, тіркемесі барлар, седелді тартқыштар – 6050 теңге, алдын ала төлеммен – 5187 теңге.

Абонемент рәсімдеу үшін 1403 нөміріндегі колл-орталыққа хабарласуға болады.