Жамбыл облысы, Сарысу аудандық “Сарысу” газетінің тілшісі Самат Тоқбанов атом элеектр станцииясы – болашақ қуат көзі екенін алға тартып, ел тұрғындарын 6 қазанда өтетін жалпыхалықтық  референдумға қатысуға шақырды, деп хабарлайды Jambylinfo.kz.  

Оның айтуынша, «шымшық сойса да қасапшы сойсын» дегендей, сала мамандары бұл істі қолдап жатқанда біз де қарманып қалмай, референдумға қатысып, тәуекелге бел буу қажет.

"Мемлекет басшысы Қасым-Жомарт Тоқаевтың Қазақстан халқына Жолдауында маңызды науқан туралы сөз етті. Елімізде АЭС салу бастамасын көтеріп, болашақта энергия көзінің баламасын табудың тетіктерін ұсынды. Аталмыш жобаның маңыздылығына тоқтала келе, келелі істі ел талқысына салуды шешті. Алдымызда үлкен саяси науқан, маңызды таңдау келе жатыр. Үстіміздегі жылдың 6 қазанында өтетін референдумда екі ойлы пікірлер мен көптеген сауалдарға нүкте қойылады. Халық таңдауын жасайды. Осы орайда, көптеген сарапшы мамандар АЭС туралы түрлі ақпараттарды бұқараға таратып тұрғындарды құлақтандыруда. Мамандардың сөзінше, бүгінде көптеген елдер атом энергетикасын белсенді дамытуда. Қазақстан да солардың қатарында. Бұл қадам біздің елімізді өсу мен өркендеу үшін қажетті энергиямен қамтамасыз ету үшін маңызды. Ресурстар шектеулі және экологиялық қиындықтар өсіп жатқан әлемде атом станциялары ең таза және тұрақты баламалардың бірін ұсынады. Олар дәстүрлі көмір немесе газ электр станцияларына қарағанда атмосфераға зиянды шығарындыларды айтарлықтай аз шығарады. Сонымен қатар, Атом энергиясы ауа-райына қарамастан тұрақты жұмыс істей алады, бұл оны сенімді энергия көзіне айналдырады»,- дейді ол.

Сонымен қатар Самат Тоқбанов бұл мақсатта Қазақстан бай табиғи ресурстарын пайдалана алатынын атап өткен.

“Қазақстан атом станциялары үшін уран – отынға бай. Бұл дегеніміз – біз өз ресурстарымызды елді де, бүкіл аймақты да энергиямен қамтамасыз ету үшін пайдалана аламыз. Бұл бізге сыртқы энергия жеткізушілеріне тәуелділікті азайтуға және экономикалық қауіпсіздікті нығайтуға мүмкіндік береді. Атом станциясының құрылысы мыңдаған жұмыс орындарын ашады және инженерлерден экологтарға дейін әртүрлі салалардағы мамандардың кәсіби өсуіне жаңа мүмкіндіктер ашады. Бірге біз өз елімізді тұрақты, табысты және прогрессивті ете аламыз. Атом энергиясы – бұл барлығына қауіпсіз және қауіпсіз болатын болашаққа инвестиция.”,-деді журналист.