Украина тарапының бастамасы бойынша Қазақстан президенті Қасым-Жомарт Тоқаев Украинаның президенті Владимир Зеленскиймен телефон арқылы сөйлесті, деп хабарлайды jambylinfo.kz. Ақорданың баспасөз қызметі хабарлағандай, Украина Президенті Қазақстанның қоғамдық ұйымдары арқылы еліне көрсетілген гуманитарлық көмегі үшін Тоқаевқа ризашылығын білдірген.

«Сондай-ақ Зеленский таяуда Давоста (Швейцария) 80-нен астам елдің өкілдері қатысқан «бейбітшілік формуласы» атты кездесудің қорытындысы және Швейцарияда өтетін кезекті жаһандық саммитке дайындық барысы жөнінде жан-жақты мәлімет берді», - деп хабарлайды Ақорда.

Сонымен қатар мемлекеттер басшылары Қазақстан мен Украина арасындағы гуманитарлық, сауда-экономикалық байланыстарды дамыту мәселелерін талқылады.