Солардың бірі – Jambyl TV телеарнасы, ол өңірдің дауысы әрі айнасы ретінде орнықты. Осы маңызды медиаресурс туралы толығырақ түсіну мақсатында біз Jambyl TV телеарнасының директоры Гүлбаршын Құланбаевамен сұхбат құрған едік.

– Гүлбаршын Қайратқызы, әңгімемізді телеарнаның құрылу тарихынан бастасақ…

– Терең тарихы мыңжылдықтар қойнауынан сыр шертетін Әулиеата өңірінде 1989 жылдың 1 қарашасында облыстық телерадиоарна өз жұмысын бастады. Бұл оқиға облыс жылнамасындағы жарқын беттердің бірі болды. Өйткені телеарна республика көлемінде 21 жыл үзілістен кейін электронды ақпарат кеңістігіне қосылған тұңғыш ұжым еді. Алғашқы кездері телеарна аптасына екі-үш мәрте ғана эфирге шығып, хабарлардың ұзақтығы 15-20 минуттан аспады. КСРО Телевизия және радио хабарларын тарату жөніндегі мемлекеттік комитеті облыстық телехабарларға 40-45 минут уақыт беріп, соған ғана қаржы бөлді. Бірінші кездері хабарлар жылжымалы телестанция арқылы таратылды. Кейін Жамбыл гидромелиоративтік инженерлік құрылыс институты күрделі жөндеуден өтіп, телеарнаға басыбайлы берілген ғимаратқа техникалық жабдықтар орнатылды. Әр жылдары «ЖТД», «Қазақстан-Тараз» деп аталып келген телерадиоарна 2017 жылы «Jambyl» атауымен ребрендингтен өтті. Осылайша 35 жылдан аса уақыт телеарна аймақтың мәдени-рухани дамуына елеулі үлес қосты. Қазіргі уақытта тәулігіне 14 сағат эфирге шығып, облыстың тынысы, мемлекеттік бағдарламалардың орындалуы, ауыл тіршілігі сынды сан саланың мәселелерін көрсетті. Телеарнаның таралу аймағы облыстың 99,3 пайызын қамтыды, сондай-ақ республикалық деңгейге де шықты.

– Сіз телеарнаның басшылығына келгелі үш жылға жуық уақыт болды. Осы уақыт ішінде қандай өзгерістер болды? Ең есте қалған жобаларыңыз қандай?

– Иә, 2022 жылдың қыркүйегінен бері директор қызметін атқардым. Ең басты мақсатым – өзім шыққан қара шаңыраққа тың серпіліс әкелу, жаңашыл жобалар жасау және арнаның қаржылық жағдайын жақсарту болды. Телевизия – қымбат сала, техника мен студияны жаңарту үшін қаржы қажет болды. Осы екі жылда бюджетіміз 100 миллион теңгеге дейін артты. Көрерменге сапалы контент ұсыну маңызды болды. Мысалы, «Aulieata-Media» холдингімен бірлесе ұйымдастырған «Қаламгер клубы» бағдарламасы мәдениет пен әдебиетке арналған ерекше жоба болды. «Бақыт кілті» жобасында қазақ келіндерінің өмірі мен отбасылық құндылықтары ашық көрсетілді. «Таразы» хабарында өңірдің 12 көне қаласының тарихы баяндалды. Сонымен қатар, деректі фильмдерге де бет бұрдық. Мысалы, Социалистік Еңбек Ері Дариха Жантоқова жайлы «Дариха» фильмі шықты. Жергілікті өнерпаздардың шығармашылығын насихаттайтын «Кеш жарық-2» бағдарламасы кең танылды. Ұлттық спортты дамытуға арналған «JasSAQ» этно-реалити жобасы – тұңғыш реалити шоуымыз болды. Сонымен қатар, анимациялық контент жасауға да көңіл бөлінді. Мысалы, «Тараз», «Тектұрмас» анимациялық роликтері жарық көрді.

– Жасанды интеллекттің көмегімен анимациялық туынды жасағаныңыз – керемет жаңалық. Бұл жоба қалай жүзеге асты?

– Иә, бұл біздің телеарна үшін тың тәжірибе болды. Жасанды интеллект қазіргі заманның ең маңызды құралдарының бірі, сондықтан біз де оны шығармашылық жұмыста қолдануға тырыстық. Тышқан мен арыстанның достығы туралы ертегі – кішкентай көрермендерге арналған ерекше сый болды. Бұл жоба – тек техникалық жаңалық қана емес, сонымен бірге біздің ұлттық мәдениетімізді, төл ертегілерімізді дәріптеудің бір түрі. Біз осы идеяны жүзеге асыру үшін шығармашылық топпен бірге ұзақ дайындық жүргіздік. Сценарий жазудан бастап, дыбыстау мен монтажға дейін әрбір сәтке үлкен жауапкершілікпен қарадық. Бұл жоба «Әжемнің ертегісі» аясында облыс әкімінің қолдауымен жарыққа шықты, сондықтан да оған ерекше мән бердік. Әлеуметтік желілерде туынды үлкен қызығушылық тудырып, көптеген көрерменнің жылы қабылдауына ие болды.

– Осы бағыттағы жұмыстарыңыз әрі қарай қалай дамитын болды?

– Әрине, бұл бағытта жұмыс жалғаса береді. Қазіргі технологиялардың мүмкіндігін толық пайдаланып, біз ұлттық мәдениетті цифрлық форматта сақтап, кеңінен насихаттағымыз келеді. Жасанды интеллект – бұл шығармашылыққа жаңа серпін беретін құрал, ол арқылы тек анимация емес, түрлі интерактивті және инновациялық жобалар жасауға болады. Біз қазір тағы бірнеше анимациялық және мультимедиялық жобалар дайындап жатырмыз. Сонымен қатар, көрерменнің пікірін ескере отырып, балаларға арналған контентті одан әрі байытып, сапасын арттыруды көздеп отырмыз. Телеарна ұжымы үшін бұл – үлкен мүмкіндік әрі жауапкершілік. Біз заман ағымынан қалмай, өзекті әрі қызықты бағдарламалар ұсыну арқылы көрерменнің сенімін ақтауға тырысамыз.

- Сұхбатыңызға рахмет!