Байзақ ауданында 120 пәтерлі көп қабатты екі тұрғын үй ел игілігіне берілді, - деп хабарлайды jambylinfo.kz

Салатанатты шараға аудан әкімі Олжас Баққараев қатысып, қоныс той иелерін қуанышымен құттықтап, пәтер кілттерін табыс етті.

⁠  ⁠Былтыр 240 байзақтық пәтерлі болған. Биыл ауданда алты тұрғын үй бой көтермек. Ол үшін бюджетке 7 миллиард теңгеге ұсыныс берілді. Қаржы бөлінсе, құрылыс басталады. Бүгін ауданымызда көптен күткен қуаныш болып жатыр. Баспана иелерін шын жүректен құттықтаймын. Мемлекеттің басым бағыттарының бірі – баспана мәселесін шешу. Бұл бойынша жұмыс алдағы уақытта да жүйелі түрде жалғаса береді,- деді Байзақ ауданының әкімі. 

Екі бірдей жаңа нысанның іргесін қалап, қабырғасын көтерген – мердігер «Бином» ЖШС. 

Бір тұрғын үйдің жалпы аумағы 2956 шаршы метр болса, пәтерлердің екі бөлмелісі 33, үш бөлмелісі  65,5 шаршы метр. 

Бүгін баспаналы болған жандардың бірі - көпбалалы ана Эльвира Әбибуллаева.  Ол 2018 жылдан бері үй кезегінде тұрған. 

  ⁠Мен алты баланың анасымын. Кеше ғана хабарласып, үй алатынымды айтты. Бүгін міне баспаналы болып отырмын. Осы күнді ұзақ күттім. Қуанышымда шек жоқ,- деді қуаныш иесі.