Жамбыл облысының әкімі Ербол Қарашөкеев Тараз қаласы Әулиеата ауданына қарасты Бектөбе тұрғын алқабында болып, ауласын су басқан тұрғын үйлерді аралап көрді, деп хабарлайды Jambylinfo.kz 

Айта кетейік, қалың қардың еруі мен жауын-шашын салдарынан облыс орталығындағы бірнеше жеке тұрғын үйдің ауласын су басқан.

Су тасқынының алдын алу және оның салдарын жою жұмыстарына 109 адам және 40-тан астам техника жұмылдырылды. Су басу қаупін азайту мақсатында құм толтырылған қаптар төселіп, шамамен 4-5 тонна инертті материал пайдаланылды. Ұзындығы 250-300 метр қорғаныс бөгеті жасалды. Сонымен қатар аулалар судан тазартылып, арық-дренаж жүйелері механикалық тәсілмен аршылды. Жұмыстар жалғасуда. 

Ербол Қарашөкеев атқарылып жатқан жұмыстармен танысып, Тараз қаласы әкімдігіне нақты тапсырмалар берді.

– Таразға екі күн бойы толассыз қар жауды. Қар қалыңдығы 63 сантиметрге дейін жетті. Ауа райының күрт жылынуына байланысты жүктеме артып отыр. Басты мақсат – тұрғындардың қауіпсіздігін қамтамасыз ету. Облыс орталығындағы барлық арық-атыздар мен каналдарды толық тексеріп, уақтылы тазарту қажет. Мәселені салдарымен күресу арқылы емес, алдын алу шараларын күшейту арқылы шешуіміз керек. Көктем мезгілі жақындап келеді. Сондықтан мұндай жағдайлардың қайталану ықтималдығы жоғары, – деді өңір басшысы.

Облыс әкімі су басу қаупі жоғары аймақтарды тұрақты бақылауда ұстауды, жұмыс қарқынын бәсеңдетпеуді, әлеуметтік желілердегі тұрғындардың өтініштері мен шағымдарына жедел әрекет етуді тапсырды.