Біз телеарна директоры Гүлбаршын Қайратқызымен арнайы сұхбаттасып, жобаның туындау тарихы мен жасанды интеллектті пайдалану тәжірибесі туралы кеңінен танысып қайтқан едік. Ол бұл бастаманың тек бір реттік жоба емес, болашақта тұрақты мультимедиа контентіне айналатынын айтты.

Телеарна директоры Гүлбаршын Құланбаеваның айтуынша, шығармашылық ұжым заманауи технологияларды батыл енгізіп, жасанды интеллектті күнделікті жұмысқа сәтті бейімдеп келеді. Соңғы уақытта Алғыс айту күні, 8 наурыз – Халықаралық әйелдер күні және Ұлыстың ұлы күні қарсаңында әлеуметтік желіде жарияланған барлық контент те осы технология арқылы жасалған. Бұл бастамалар көрермен тарапынан жылы қабылданып отыр.

– Шығармашылық – жалғыз адамның ісі емес. Бұл – ортақ ой мен еңбектің жемісі. Ертегінің сценарийін дайындау, кейіпкерлерді дыбыстау, көркемдеу – мұның бәрі үлкен күш пен ұжымдық үйлесімді талап етеді. Басты мақтауға лайық – осы жобаның дизайнері, жасанды интеллект құралдарын жетік меңгерген Жарас Сейсебаев, – дейді Гүлбаршын Құланбаева.

Жарас Сейсебаев – еңбек жолын дәл осы телеарнада бастаған, бүгінде үш жылдан бері шығармашылық ұжымды тың идеяларымен қуантқан талантты маман. Оның мультфильмнің көркемдік шешімін табудағы еңбегі ерекше.

Сондай-ақ, дыбыстау жұмыстарына қолдау көрсеткен Мәдениет саласының үздігі Асқарбек Сейілхан мен «Атамекен бизнес» телеарнасының өңірдегі тілшісі Нұрлан Асқардың үлесі де зор. Шығармашылық топ олардың көмегін ерекше ризашылықпен атап өтті.

– Қазіргі медиа саласында трендтен қалмай, жаңа форматтарға бейімделу өте маңызды. «Бұл ертегі идеясы қалай туды?» деген сұраққа келсек, біз алдымен көне Тараздың бай тарихын балаларға таныту мақсатында фотосуреттерді жасанды интеллектпен өңдеп, ертегі түрінде ұсындық. Күтпеген жерден бұл жоба әлеуметтік желіде үлкен қызығушылық тудырып, кеңінен тарады. Осыдан кейін өзіміздің қысқа-қысқа қазақ ертегілерін неге мультфильм етіп ұсынбасқа деген ой келді. Нәтижесінде, алғашқы толыққанды туындымыз өмірге келді, – дейді телеарна басшысы.

Айта кету керек, бұл мультфильм «Әжемнің ертегісі» жобасы аясында, Жамбыл облысы әкімінің қолдауымен жүзеге асып отыр.

Жас ұрпақтың таным көкжиегін кеңейтуді көздейтін бұл бастама – өңірлік телеарнаның тың серпілісі ғана емес, отандық анимация саласына қосылған үлес деуге болады.