Бүгін Мырзатай ауылдық округінде 120 орындық жаңа мәдениет үйі пайдалануға берілді, деп хабарлайды Jambylinfo.kz 

Өз кезегінде облыс әкімі ауыл тұрғындарын қуанышымен құттықтап, өңірдің мәдениет саласында атқарылып жатқан жұмыстарға тоқталды.

- Тәуелсіздік жылдарынан бері ұлттың рухани иммунитетін қалыптастыратын, құндылықтардың дамуына, сақтауға мемлекет тарапынан көп көңіл бөлініп келеді.  Бүгінде ауданымызда  40-қа жуық мәдениет ошағы бар. Әрбір мәдениет ошағы-ұлт өнерінің көмбесі, ұлт мұрасының ордасы.  

Алдағы уақытта Ақжар, Ақшолақ, Базарбай ауылдарында  мәдениет ошақтары салынатын болады. Осылайша ауданымыздағы барлық   елді мекендер  мәдениет нысандарымен 100 пайыз қамтылатын болады, - деді аймақ басшысы.

Бұдан соң жаңа нысанның лентасы қиылып, қонақтар мен ауыл тұрғындары соңғы үлгідегі озық технологиямен жабдықталған мәдениет ошағымен танысты. 

Байзақ ауданы әкімдігінің сәулет, қалақұрылысы және құрылыс бөлімі КММ-сі тапсырысы аясында құрылысын мердігер «Ник Тараз» ЖШС  жүргізген ғимараттың жобалық құны 266 911,5 мың теңгені құраған. Онда 6 қызметкер, 4 үйірме яғни, «Сымбат» ән үйірмесі, «Аяулы әжелер» үйірмесі, «Сөз патшасы» мәнерлеп оқу үйірмесі, «Балауса» би үйірмесі жұмыс істейді. Жалпы аумағы 547 м² құрайтын нысан елді мекендегі тұрғындардың игілігіне қызмет көрсететін болады.