Тараз қаласындағы 5513 әскери бөлімі «Ашық есік күні» ұйымдастырып, оған қаладағы мектептердің 100-ден астам оқушысын шақырған, деп хабарлайды jambylinfo.kz.

«Бөлім қолбасшылығы оқушыларға әскери бөлімінің ішінде толыққанды экскурсия ұйымдастырып, оқушылар роталардың барлық казармалық бөлмелерін, сабақ өтетін сыныптарын және спорттық бұрыштарын көрді.  Осылайша, оқушылар сарбаздардың күнделікті өмірі қандай болатыны туралы толық ақпарат алды», - деп хабарлайды әскери бөлімнің тәрбие және әлеуметтік-құқықтық жұмыстар бөлімшесі бастығының аға көмекшісі лейтенант Салтанат Әзімхан.

Оның айтуынша, әскери қызметшілер оқушылар алдында әскери қару-жарақ пен әскери бөлімнің қаруланған жауынгерлік техникаларын да паш еткен.

«Іс-шараға келген мектеп оқушылары әскери қызметшілерге алғыс айтты. Жалпы, бұндай шаралар патриотизм мен жас ұрпақтың Отанға деген сүйіспеншілігін қалыптастыруда зор маңызға ие», - дейді Салтанат Әзімхан.