Тараздағы 4 мектептің оқушылары “Казфосфат” ЖШС-нің Жаңа Жамбыл фосфор зауытымен танысты, деп хабарлайды Jambylinfo.kz.

2025 жыл Мемлекет басшысының Жарлығымен “Жұмысшы мамандықтар жылы” деп жарияланды. Осыған орай, Тараз қаласының 4 мектебінен 150 оқушыға “Казфосфат” ЖШС-нің Жаңа Жамбыл фосфор зауытына экскурсия ұйымдастырылды.

Экскурсия барысында оқушылар зауыттың өндіріс процесімен, жұмысшылардың күнделікті қызметімен және заманауи технологиялармен танысты. Оларға фосфор өнімдерін өндірудің негізгі кезеңдері, еңбек қауіпсіздігі және жұмысшылардың рөлі туралы жан-жақты ақпарат берілді.
Мұндай іс-шаралар жұмысшы мамандықтарының беделін арттыруға, болашақ мамандарды еңбек нарығының сұраныстарына бейімдеуге және жастардың өндірістік кәсіпорындарға деген қызығушылығын арттыруға бағытталған.

Бұл экскурсия оқушыларға өз болашақ мамандығын дұрыс таңдау үшін үлкен мүмкіндік беріп, өндіріс саласының маңыздылығын тереңірек түсінуге ықпал етті.