Бұл айда жаңа әуе бағыттары ашылып, кино премьералар көрсетіледі, саяхатшыларға арналған жаңа ережелер күшіне енеді, кейбір платформалар өз жұмысын тоқтатады, - деп хабарлайды Jambylinfo.kz 

Мамырдағы демалыс күндері

Мамырда үш ресми мереке бар:

– 1 мамыр, бейсенбі – Қазақстан халқының бірлігі күні

– 7 мамыр, сәрсенбі – Отан қорғаушылар күні

– 9 мамыр, жұма – Жеңіс күні

Бұл күндер – ресми демалыс. Бес күндік жұмыс аптасында демалыс күндері мынадай болады:

1 мамыр – бейсенбі – демалыс

2 мамыр – жұма – жұмыс күні

3–4 мамыр – сенбі-жексенбі – демалыс

5–6 мамыр – дүйсенбі мен сейсенбі – жұмыс күндері

7 мамыр – сәрсенбі – демалыс

8 мамыр – бейсенбі – жұмыс күні

9 мамыр – жұма – демалыс

10–11 мамыр – сенбі-жексенбі – демалыс

Осылайша, мамырда 12 демалыс күні болады. Ал алты күндік жұмыс аптасында демалыс күндері аз болады, өйткені сенбі – жұмыс күні.

Мобильді телефондарды тіркеудің соңғы мүмкіндігі

Қазақстанға 2025 жылғы 25 наурыздан кейін әкелінген мобильді құрылғыларды тіркеу 26 мамырға дейін жалғасады. Осы мерзімнен кейін тіркелмеген смартфондарға мобильді байланыс қызметтері шектеледі.

Бұған дейін елде жұмыс істеп тұрған құрылғылар автоматты түрде тіркелген тізімде қала береді және еш шектеусіз жұмыс істейді.

АҚШ визасын алу тәртібі өзгереді

2 мамырдан бастап Астана мен Алматыдағы консулдық бөлімдер визалық сұхбатқа жазылуды сұхбаттан үш жұмыс күні бұрын сағат 17:00-де жабады.

Мысалы, 2 мамырға сұхбатқа жазылғандар 28 сәуір сағат 17:00-ге дейін DS-160 формасын толтырып, жіберуі тиіс. Егер форма дұрыс толтырылмаса, сұхбат жойылады, ал үміткер «келмеген» деп есептеледі.

Жедел жәрдем қызметі жаңарады

1 мамырдан бастап елде мобильді бригадалар іске қосылады. Олар бастапқы медициналық-санитарлық көмек мамандарынан құралған және жеделдіктің 4-санатына (жеңіл жарақат, созылмалы аурулардың асқынуы, қызу көтерілу, қан қысымының көтерілуі, т.б.) жататын шақыртуларға барады.

Мобильді бригадалар дүйсенбі–жұма аралығында сағат 08:00–19:00, ал сенбі күні 08:00–12:00 аралығында жұмыс істейді. Басқа уақыттарда шақыртуларға фельдшерлік немесе дәрігерлік жедел жәрдем бригадалары шығады.

103 нөмірі арқылы шақырылатын жедел жәрдем тәулік бойы қолжетімді. Келу уақыты шақыртудың жеделдігіне байланысты: ең қысқа мерзімі – 10 минут, ең ұзығы – 60 минут.

Жаңа әуе рейстері іске қосылады

1 мамырдан бастап «QazaqAir» әуе компаниясы Астана – Түркістан – Самарқанд бағыты бойынша рейстерді бастайды. Ұшулар бейсенбі мен жексенбі күндері орындалады. Билет құны – 41 000 теңгеден басталады.

27 мамырдан бастап Air Astana Атырау – Тбилиси бағытындағы рейсті іске қосады. Ұшулар сейсенбі, жұма және жексенбі күндері болады. Ұшу уақыты – 1 сағат 50 минут, билет құны – эконом-класста 113 375 теңгеден, бизнес-класста 308 081 теңгеден басталады.

30 мамырдан бастап SCAT компаниясы Шымкент – Үрімші бағытындағы рейсті бастайды. Шымкенттен ұшулар – сейсенбі және жұма күндері, кері бағытта – сәрсенбі және сенбі күндері. Ұшу уақыты – 2 сағат 20 минут, билет бағасы – 73 000 теңгеден басталады.

ҰБТ басталады

Биылғы түлектер 25 сәуірге дейін өтініш беріп үлгеруі керек. Негізгі ҰБТ 16 мамыр мен 5 шілде аралығында өтеді.

Талапкерлер тест тапсыру күні, уақыты мен орнын өздері таңдай алады. ҰБТ үш міндетті және екі бейіндік пәннен тұрады. Максималды ұпай – 140, тестілеу уақыты – 4 сағат (240 минут). Апелляцияға өтініш тест аяқталған соң 30 минут ішінде беріледі. Нәтиже сертификаты апелляция қаралған соң жеке кабинетте қолжетімді болады.

Димаш Құдайберген жанкүйерлерімен кездеседі

26 мамырда Алматыдағы Almaty Arena мұз сарайында Димаш туған күніне орай фан-кездесу өткізеді. Онда «Stranger» атты концерт көрсетіледі, әнші тыңдармандардың сұрақтарына жауап беріп, жаңа әндері мен клиптерін ұсынады.

Еске салсақ, бұл концерт 2024 жылғы қыркүйекте Астанада өткен. Ал 27 мамырдан бастап «Stranger» шоуы ел кинотеатрларында толықтай эффектімен көрсетіледі.