Абай облысының әйелдерге арналған қылмыстық-атқару мекемесінде 30 жастағы сотталған әйел мен оның 50 жастағы сүйіктісі ресми түрде неке қидырды, , деп хабарлайды Jambylinfo.kz polisia.kz cілтеме жасап.

Басылымның хабарлауынша, болашақ ерлі-зайыпты бір-бірімен Астана қаласында, сот процесі кезінде танысқан. Сот отырысы барысында әйел өзін нашар сезініп, сотқа жедел жәрдем шақырылған. Көмекке келген фельдшердің көзі сол сәтте жас сотталушыға түскен. Кейіннен онымен байланысын үзбей, моральдық тұрғыдан қолдау көрсетіп отырған. Ол тергеу изоляторына барып тұрған, хаттар жазып, кеңес беріп, қиын сәттерде жанынан табылған. Уақыт өте келе олардың арасындағы байланыс шынайы сезімге ұласқан.

Ер адам сүйіктісіне өмірлік серік болуды ұсынып, неке қию туралы шешім қабылдады. Әйел есірткі заттарын заңсыз қолданғаны үшін үш жыл мерзімге бас бостандығынан айыру жазасын өтеп жатқанымен, бұл жағдай олардың қарым-қатынасына кедергі болмаған. Мекемеге келгеннен кейін екі ай өткен соң ер адам гүл шоқтары мен көйлегін алып, ресми некені тіркеу рәсіміне келді. Мекеме әкімшілігінің қолдауымен шағын, бірақ жүрек жылытқан салтанатты іс-шара ұйымдастырылды. Ерлі-зайыпты неке жүзіктерімен алмасты.

Сотталған әйел өмірінің осындай қиын кезеңінде сүйіспеншілік пен қолдау табамын деп күтпегенін айтып, қуаныш көз жасын жасыра алмады. Ал күйеуі мекеме әкімшілігіне ризашылығын білдіріп, махаббат адамды адами болмысынан айрылмауға және кез келген сынақтан өтуге күш беретінін атап өтті.

Рәсім соңында мекеме қызметкерлері ерлі-зайыптыға өзара сыйластық, түсіністік пен берік бақыт тіледі.