Елімізде 6 қазақ күні атом электр станциясын салу бойынша жалпыхалықтық рефрендум өтеді. АЭС – қауіпсіз ғана емес, ең сенімді энергия көзі.  Мұндай пікірді Жамбыл облысы Өңірлік коммуникациялар қызметінің маманы Мәдина Ақтанова білдірді, деп хабарлайды Jambylinfo.kz. 

Мәдина Ақтанова АЭС үлкен көлемде электр энергиясын өндіре алады, әсіресе халық саны көп аймақтар үшін маңызды екенін алға тартты.

«АЭС үлкен көлемде электр энергиясын өндіре алады, әсіресе халық саны көп аймақтар үшін маңызды. Сондай-ақ, атом электр станциялары парниктік газдарды аз шығарады, бұл климаттың өзгеруіне қарсы күресте маңызды рөл атқарады. Тұрақты түрде энергия өндіре алады, бұл жел немесе күн энергиясымен салыстырғанда маңызды артықшылық деуге болады»,-дейді ол.

Сондай-ақ, жас маман АЭС салу үлкен жауапкершілік әрі білікті мамандарды қажет ететінін баса айтқан

«АЭС салу және оны іске қосу өте қымбат, сонымен қатар оны дұрыс басқару үшін жоғары білікті мамандар қажет. Әрине, АЭС-тің артықшылығы көп. Алайда жауапкершілік пен мұқият жоспарлауды талап етеді. Қазақстанда АЭС салу идеясына қатысты пікірімде екі жақты көзқарас бар.

1. Энергетикалық тәуелсіздік: АЭС Қазақстанның энергетикалық тәуелсіздігін арттыруға көмектеседі. Қазіргі уақытта елде электр энергиясы негізінен көмірден өндіріледі, ал атом энергиясы бұл саладағы әртараптандыруға ықпал ете алады;

2.    Экономикалық тиімділік: Ұзақ мерзімді перспективада АЭС арзан әрі тұрақты энергия көзі болуы мүмкін. Бұл ел экономикасының дамуына және өнеркәсіптің өсуіне үлес қосады;

3.  Технологиялық даму: АЭС салу жоғары технологиялық саланы дамытуға, ғылым мен техниканың алға жылжуына септігін тигізеді. Осы себептерді ескере отырып, АЭС салу идеясын қолдауға болады, бірақ ол жан-жақты талдау мен кеңесулерді қажет етеді. Халықтың мүддесін ескеру және қауіпсіздік мәселелерін шешу басты орында болуы керек»,- дейді жас маман.

Сонымен қатар, Мәдина Ақтанова қоғамдық пікірді ескеру АЭС салу орны туралы шешім қабылдауда маңызды рөл атқаратынын алға тартып, халықты жаппай рефендумға қатысуға шақырған.

«Жалпы референдум халықтың сенімін арттырып, жобаның әлеуметтік және саяси тұрақтылығын қамтамасыз ету үшін қажет. Әрі қарайғы процестерде жергілікті тұрғындармен ашық диалог жүргізу, олардың алаңдаушылықтарын тыңдау және ескеру маңызды. Қорытындылай келе, атом электр станциясын салу энергетикалық тәуелсіздікке және климаттың өзгеруіне қарсы күреске оң әсер ете алатын маңызды шешім болып табылады. Алайда, қауіпсіздік мәселелері, радиоактивті қалдықтарды басқару және қаржылық шығындар сияқты маңызды факторлар да бар. Сондықтан, АЭС құрылысына қатысты шешім қабылдау барысында экологиялық, экономикалық және қауіпсіздік аспектілерін мұқият қарастырып, халықтың пікірін ескеру қажет. Бұл ұзақмерзімді пайда мен ықтимал тәуекелдерді теңестіру үшін маңызды»,- деді ол.