Астанада University Medical Center базасында алғаш рет көпұрықтық жүктілік кезінде екі бірегей жатырішілік операция жүргізілді, - деп хабарлайды Jambylinfo.kz

Бұл Денсаулық сақтау министрлігі мен AYALA қайырымдылық қорының бастамасымен іске қосылған «Феталдық медицина» жобасының нәтижесі.

Ресейлік жетекші мамандар—медицина ғылымдарының докторы Кирилл Костюков және акушер-гинеколог Виктория Сакало—UMC командасымен бірлесіп, монохориондық көпұрықтық жүктіліктің асқынуларын түзету бойынша жоғары дәлдікті хирургиялық араласу жасады. Олар фето-ұрықтық трансфузиялық синдром мен кері артериялық перфузия синдромын емдеу арқылы сәтті операциялар жүргізді.

Неге бұл маңызды?

Монохориондық егіздер – бір жұмыртқадан дамитын, генетикалық тұрғыдан бірдей балалар. Алайда, мұндай жүктіліктің асқыну қаупі жоғары, себебі ұрықтар бір плацентаны бөліседі, ал қан айналымындағы ауытқулар өмірге қауіп төндіруі мүмкін.

Қазақстанда акушерлік практикада пренаталдық диагностика қарқынды дамып келеді. Осы бағдарлама аясында елімізде 35 жатырішілік операция жасалып, 32 нәрестенің өмірі сақталды.

Жыл сайын еліміздің жетекші медициналық орталықтарында 150-ге жуық феталдық операция жасау жоспарланып отыр. Қазіргі таңда бұл күрделі оталар тек Алматыдағы балалар кардиохирургиясы орталығы мен елордалық Ана мен бала орталығында ғана жасалады.

Сонымен қатар, туа біткен кемістіктерді ерте анықтау мақсатында 15 перинаталдық орталықта «Бір күндік клиникалар» ашылды. Бұл орталықтарда 30 мыңнан астам жүкті әйел тексеруден өтіп, ауыр патологиялары бар балалардың дүниеге келу қаупін азайтуға мүмкіндік жасалды.

Бұл жаңашылдықтар ана мен бала денсаулығын сақтаудағы маңызды қадамдардың бірі болып табылады.