Мемлекеттік кірістер комитеті банкрот атанғысы келген қазақстандықтарға қатысты алғашқы мәліметтерді жариялады. «3 наурызда азаматтардан банкроттық туралы өтініш қабылдау басталды. Сағат 16:00-дегі жағдай бойынша банкроттық туралы соттан тыс 1 469 өтініш келіп түсті. Оның ішінде eGov арқылы 1 399, ал e-Salyq Azamat арқылы 70 өтінім бар. Алғашқы өтініш электронды үкімет порталы арқылы Жамбыл облысынан сағат 09:05-те келді», - делінген хабарламада. Кірістер комитеті ұсынған ақпаратқа сәйкес, кешкі сағат 21:00-дегі жағдай бойынша ел аумағынан 2 466 өтініш түскен. Банкроттыққа өтініш беру бойынша көш басында Түркістан облысы тұр (289 өтініш). Екінші сатыда 238 өтінішпен Алматы қаласы, үшінші орында Алматы облысы (227 өтініш) орналасқан.