Үкімет басшысы Олжас Бектенов Маңғыстау обысындағы жаппай уланудан кейін мектеп асханаларының жағдайын тексеруді  тапсырды, деп хабарлайды Jambylinfo.kz.

 Бүгінгі таңда 460 бала дәрігерлердің бақылауында, оның 83-і ауруханаға жатқызылды. Зардап шеккендердің барлығы, оның ішінде жансақтау бөліміндегі балалардың жағдайы тұрақты.

«Премьер-министрдің тапсырмасы бойынша бір ай ішінде республикадағы барлық мектептердің асханаларында санитариялық-эпидемиологиялық талаптардың сақталуына мониторинг жүреді. Балалар уланған №8 мектепте тергеу басталған. Кінәлі тұлғалар жауапқа тартылады», — деп хабарлады үкіметтің баспасөз қызметі.

Еске салайық, өткен аптада Маңғыстау облысы Мұнайлы ауданы Бесшоқы ауылындағы №8 мектептің бастауыш сынып оқушылары мектеп асханасындағы тамақтан уланған еді. 

Осы факт бойынша қылмыстық кодекстің 304-бабы (Санитариялық қағидаларды немесе гигиеналық нормативтерді бұзу) 1-бөлімі бойынша іс қозғалған.