Қазақстанда оқушыны  бір мектептен екінші мектепке eGov.kz порталының көмегімен онлайн түрде ауыстыру мүмкіндігі пайда болды, деп хабарлайды Jambylinfo.kz.

Оқу-ағарту министрлігі бұл процестің қалай жүзеге асырылатынын түсіндірген. 

"Енді ата-аналар мен заңды өкілдер eGov.kz порталы арқылы баланы бір мектептен екіншісіне онлайн ауыстыра алады. Жалпы білім беретін ұйымды іздеу және іріктеу процесі ата-ананың тіркелген жері бойынша микросайт үшін оңтайландырылған. Жаңа процесс есептен шығару және бекіту талондарын, сондай-ақ жеке іс құжаттарын тапсыруды қажет етпейді. Мектеп таңдаған кезде оқу тілі де көрсетіледі. Сондай-ақ өтініш берушінің өтінімді қайтарып алуға мүмкіндігі бар", делінген ведомствоның хабарламасында. 

Мемлекеттік қызметті алу үшін:

• eGov.kz порталына кіріп, "Білім" бөліміне өтіңіз;
• тізімнен "Орта білім" бөлімін таңдап, ары қарай "Балаларды мектептен мектепке ауыстыру үшін құжаттарды қабылдау" қызметіне өтіңіз;
• қажетті жолдарды толтыру және электрондық қолтаңбаны пайдаланып өтінішке қол қою;   
• Қызмет нәтижелерін “Жеке кабинеттен” көруге болады.