Іздеу операциясына шамамен 400 адам, 70-тен астам техника, дрондар, эхолоттар, суасты сканерлері мен қызметтік иттер жұмылдырылған.

«Су қоймасының акваториясы мен жағалау аумағы, оның ішінде терең әрі қолжетімділігі төмен жерлер кешенді түрде тексеріліп жатыр. Іздеу жұмыстары күндіз-түні үздіксіз жүргізілуде. Жоғалғандардың жақын туыстарымен тұрақты түрде жеке жұмыс ұйымдастырылған», – делінген министрлік мәлімдемесінде.

Іздеуді күрделендіріп тұрған басты факторлар: су асты бедерлерінің күрделілігі, тұнба қабатының қалыңдығы және көру мүмкіндігінің нөлге тең болуы. Операцияны оқиға орнында Әуе күштерінің қолбасшысы, генерал-майор Асқар Избасов басқарып отыр.

Іздестіру жұмыстары нақты нәтижеге жеткенге дейін жалғаспақ.