Тараз қаласындағы Ы.Дүкенұлы атындағы қалалық мәдениет үйінде Республика күніне орай өткізілген салтанатты жиын қала тұрғындары үшін ерекше мереке болды. Іс-шараға Тараз қаласының әкімі Бақытжан Орынбеков, қалалық мәслихат төрағасы Кенжебек Олжабай, ардагерлер, зиялы қауым өкілдері және қала тұрғындары қатысты. Мерекелік жиын ұлттық мерекенің маңыздылығын айқындай отырып, елдің өткеніне құрмет көрсету мен болашаққа деген сенімді нығайтуға бағытталған мазмұнды кездесуге айналды.
Жиын барысында алғаш болып сөз алған қала әкімі Бақытжан Әмірбекұлы жиналған қауымды Республика күнімен құттықтап, қазақ халқының тәуелсіздік жолындағы ұмтылысы мен бүгінгі жетістіктеріне тоқталды. Өз сөзінде ол осыдан 34 жыл бұрын, 1990 жылы еліміздің егемендігін айғақтайтын арнайы Декларация қабылданғанын атап өтті. Бұл тарихи құжат Қазақстанның тәуелсіздігіне жасалған алғашқы қадам ретінде танылып, ел тарихында маңызды орын алды.
– Осы атаулы мереке – біздің ұлы тәуелсіздігіміздің бастауы. Осыдан бері Қазақстан әлемдік аренада өз орнын айқындап, сан түрлі салада зор табыстарға қол жеткізді. Егемендігіміздің нығаюы арқасында өңірлердің де өркендеуі қарқынды жүріп, халықтың әл-ауқаты артып келеді. Оның ішінде Тараз қаласы да заманауи бастамалар мен маңызды жобаларды жүзеге асырып, даму жолында айтарлықтай жетістіктерге жетті. Соңғы жылдары қалада өнеркәсіп, білім беру, инфрақұрылым және экономика салаларында оң нәтижелер байқалады. Бұл жетістіктердің барлығы азаттығымыздың арқасында іске асып отыр, – деді Бақытжан Орынбеков.
Осыдан кейін қала әкімі Тараздың дамуына айрықша үлес қосқан бірқатар азаматты марапаттады. Оларға «Тараз қаласының Құрметті азаматы» атағы, «Облысқа сіңірген еңбегі үшін» төсбелгісі және арнаулы Алғыс хаттар мен Құрмет грамоталары табысталды. Бұл марапаттар елдің гүлденуіне, өңірдің көркеюіне елеулі еңбек сіңірген азаматтарға көрсетілген құрметтің көрінісі болды.
Салтанатты жиынның сәнін келтірген тағы бір ерекше сәт – жергілікті өнерпаздардың дайындаған концерттік бағдарламасы болды. Олардың патриоттық әндері мен ұлттық өнерді дәріптеген қойылымдары жиналған қауымды рухтандырып, мерекелік көңіл-күй сыйлады. Жиналған қауым өнерпаздардың өнеріне тәнті болып, қошеметпен қарсы алды.
Республика күніне арналған бұл іс-шара халқымыздың өткен тарихына, ұлттың бірлігі мен тәуелсіздікке деген құрметін айшықтай түсті. Қазақстанның алдағы дамуына бағыт-бағдар беретін болашақ ұрпаққа осы тәрізді мерекелердің маңыздылығы зор. Тараз тұрғындары бұл күні елдің, тәуелсіздіктің және бірліктің қадірін тағы да сезініп, болашаққа үлкен үмітпен қарады.
Автор
jambylinfo.kz
Jambylinfo.kz- Әлемдегі және еліміздегі соңғы жаңалықтар. Түрлі мәселелерден біздің ақпарат агенттігі арқылы хабарда болыңыз
Алдыңғы мақала
Ұқсас жаңалықтар
