Финалда тартысты өткен ойында Шымкент қаласының командасын 5:4 есебімен жеңген жамбылдық шабандоздарды Тараз қаласының халқы ерекше қуанышпен күтіп алды, - деп хабарлайды Jambylinfo.kz

Ойынның негізгі уақыты тең аяқталып, шешуші сәтте Асен Арнұр салған «алтын салым» команданы жеңіске жетеледі. Бұл — Әулиеата өңірінің жастар командасы үшін ел чемпионатындағы тоғызыншы мәрте жеңіс!

Жамбылдық шабандоздар жарыс барысында төмендегідей нәтижелерге қол жеткізді:

5:4 – Түркістан облысы

9:2 – Жетісу облысы

6:3 – Алматы облысы

5:4 – Шымкент қаласы

Барлық қарсыластарын айқын басымдықпен жеңген команда ұлттық спорттағы шеберліктерін тағы бір мәрте дәлелдеді. Есжан Құрманбай баптаған құрамның ойыны, тактикалық дайындығы мен төзімділігі жанкүйерлерді тәнті етті. Жамбыл облысына оралған чемпиондарды облыс тұрғындары, спорт жанашырлары мен туыстары Тараз қаласының шығыс қақпасынан ерекше қошеметпен қарсы алды. Қолдарына ту ұстаған жастар, күй тартып, ән шырқаған өнерпаздар — барлығы жеңіс рухын сезініп, қуанышты бөлісті. Бұл жетістік — өңірде ұлттық спортқа көрсетіліп жатқан жүйелі қолдаудың нақты жемісі. Бүгінде көкпар Жамбыл жастары үшін жай ғана спорт емес, рухтың, намыстың, елге деген сүйіспеншіліктің символына айналған.