Қазіргі таңда су қоймасында шамамен 18,5 млрд текше метр су жиналған. Министрліктің мәліметінше, оның толуы облыстағы Ақдала және Шеңгелді суармалы алқаптарын сумен толықтай қамтуға мүмкіндік береді, - деп хабарлайды Jambylinfo.kz 

Айта кетейік, су қоймасының толық толуы қатарынан екінші жыл тіркеліп отыр. Оған дейін мұндай жағдай соңғы он жылда алғаш рет болған. 

Қапшағай су қоймасы Іле өзенінің ағысын реттеуде маңызды рөл атқарады. Биылғы жылдың басынан бері Балқаш көліне 3,8 миллиард текше метр су жіберілген. Соның нәтижесінде Балқаштың деңгейі 12 сантиметрге көтеріліп, Балтық жүйесі бойынша 341,52 метрден 341,64 метрге жеткен. Көлдегі су көлемі 2 миллиард текше метрге артты.