Өңірде эпидемиологиялық қауіпсіздікті қамтамасыз ету және инфекциялық аурулар кезінде медициналық көмектің қолжетімділігін арттыру мақсатында 325 төсек-орындық облыстық жұқпалы аурулар ауруханасының құрылысы жоспарланған.

Қазіргі уақытта нысанға арналған жер учаскесін таңдау жұмыстары жүргізілуде. 2026 жылы жобалау-сметалық құжаттаманы әзірлеу басталып, 2027–2029 жылдары құрылыс-монтаждау жұмыстары жүзеге асырылады деп күтілуде.

Жоспарланған медициналық ұйым халықаралық стандарттарға сәйкес жобаланып, инфекциялық стационар, реанимация және қарқынды терапия бөлімшелері, зертханалық-диагностикалық кешендермен жабдықталмақ.

Жобаның жүзеге асырылуы аймақтың эпидемиологиялық тұрақтылығын арттыруға, жұқпалы ауруларды ерте диагностикалау мен тиімді емдеу көрсеткіштерін жақсартуға, сондай-ақ төтенше жағдайлар кезінде төсек-орын қорын жедел қолдану мүмкіндігін кеңейтуге мүмкіндік береді.