Биылғы жылдың басынан бері елімізде 50 мыңнан астам адам банкрот деп танылған, деп хабарлайды Jambylinfo.kz 

Ал банкрот деп танылған қазақстандықтардың жалпы қарызы 188 млрд теңгеге жеткен. 

Бұл туралы ОКҚ-дегі баспасөз конференциясында ҚР қаржы вице-министрі Ержан Біржанов мәлімдеді. 

Оның айтуынша, жеке тұлғалардың банкроттығы туралы заңнаманы жетілдіру жалғасуда. 

«2025 жылғы 1 қаңтарға дейін жасалған қарыз шарттарына борышты реттеуді жүргізу туралы талапты алып тастау; борышкердің себептерін көрсетпей соттан тыс банкроттық рәсімін тоқтату құқығы; банкроттың қаржы ұйымдары алдындағы, оның ішінде кредиттік бюролар базасында көрсетілмеген барлық міндеттемелерін тоқтату қарастырылған бірқатар түзетулер қабылданды», - деді спикер.  

Сонымен қатар, Парламентте ломбардтарды соттан тыс банкроттық рәсіміндегі кредиторлардан шығару, сондай-ақ борыштары 1600 АЕК-ке дейінгі борышкер азаматтар үшін банкроттық рәсімін өткізу мерзімдерін қысқарту бойынша түзетулер қаралуда.