Мәжіліс ғылым мәселелері бойынша ғылыми-техникалық қызметті жетілдіруге бағытталған депутаттық түзетулерді бірінші оқылымда мақұлдады, деп хабарлайды Jambylinfo.kz 

Заң жобасында ғалымдар мен ғылыми қызметкерлердің мәртебесі айқындалады. Олардың құқықтары мен бостандықтарын қорғау, академиялық еркіндікке кепілдік беру, шығармашылық еркіндігі, сондай-ақ ғылыми қызметінің бағыттарын жоспарлау және айқындау мүмкіндігі қарастырылған.

Ұжымдық пайдалануға арналған ғылыми зертханалар инфрақұрылымына қолжетімділікті қамтамасыз ету тетігі бекітіледі. Сонымен қатар барлық ғылыми қызметкерлердің мемлекеттік тапсырыс аясында сатып алынған ғылыми жабдықтарды пайдалануға қол жеткізу механизмі әзірленеді.

Осы өзгерістер аясында пәндік олимпиадалар мен ғылыми жобаларға қатысатын, ұлттық құрама құрамына енген, ғылыммен айналысатын дарынды балалар да мемлекеттік университеттердің зертханаларын тегін пайдалану мүмкіндігіне ие болады.

Ғылыми жобаларды тұрақты қаржыландыруды қамтамасыз ету мақсатымен оларды іске асыру мерзімі келісімшарт жасалған күннен бастап күнтізбелік жоспарға сәйкес барлық іс-шаралар толық орындалғанға дейін белгіленді. Ғылыми қызметті қаржыландыру тәртібі жетілдірілді.

Ұлттық ғылым академиясы (ҰҒА) квазимемлекеттік сектор субъектісі ретінде айқындалады. Бұл ҰҒА мүлкін қалыптастыру мен оған иелік ету тәртібін, қаржыландыру көздерін және әкімшілік-басқару қызметіне қатысты өзге де мәселелерді заңнамалық тұрғыда реттеуге мүмкіндік береді.

Дәрілік заттарды тіркеу және қайта тіркеу тәртібі жеңілдейді

Ғылым мәселелері бойынша түзетулер аясында дәрілік заттарды тіркеу және қайта тіркеу тәртібін композиттік мемлекеттік қызмет форматында оңтайландыру нормалары мақұлданды. Бұл дәрілік препараттарды тіркеу мерзімін 210 күннен 100 күнге, яғни екі еседен артық қысқартуға мүмкіндік береді.

Сонымен қатар Денсаулық сақтау министрлігіне фармацевтикалық компаниялардың өтінімдерін күтпей-ақ, Қазақстан үшін қажетті дәрілік заттарды тіркеуге өз бетінше өтінім беру құзыреті беріледі. Бұдан бөлек, дәрілік заттарды өндіруде қолданылатын заттар мен субстанциялардың сапасын бақылау тетігі енгізіледі.

Сондай-ақ денсаулық сақтау саласында референс-орталықтар құру туралы түзетулер мақұлданды. Олар жоғары технологиялық медициналық көмектің бірыңғай стандарттарын қамтамасыз етіп, диагностиканың дәлдігін арттыруға және денсаулық сақтау жүйесіне әдістемелік қолдау көрсетуге бағытталған.