Ұлытау облысындағы Жаңаарқа ауданының бұрынғы әкімі Сәкен Оспанов жұмысшысын ұрып өлтірді деген күдікке ілінді, деп хабарлайды Jambylinfo.kz

Марқұмның аты-жөні – Дмитрий Рябцев екен. Ол әйелі, екі баласымен бірге шаруа қожалығында жұмыс істеген. Жұмыс орны қолайсыз болғандықтан ол жерден қашып кетіп, аудан орталығындағы хостелде түнемек болған.

Сәкен Оспанов сол жерге барып, жанжал шығарған. Әзірге ұрыс неден туындағаны белгісіз. Алайда бұрынғы әкім Дмитрий Рябцевті отбасының көзінше ұрып тастаған.

Ер адам алған жарақаттарынан көз жұмды. Аталмыш факті бойынша қылмыстық іс қозғалды.

–  Адам өліміне әкеп соққан ауыр дене жарақатын келтіру фактісі бойынша Ұлытау облыстық полиция департаменті қылмыстық іс қозғады және тергеу жүргізіп жатыр. Полиция қылмыс жасады деген күдікпен 65 жастағы жергілікті тұрғынды қамауға алды, – деп хабарлады Ұлытау облыстық Полиция департаментінің баспасөз қызметі.